تفك النحس 1
– وأنا هعمل مكالمة وآجي. نادى والدي هو كمان عشان نمشي فقومت أسلم على الموجودين، ولما وصلت لدلال همست في ودني: – بيحبك يا بت… قلبي دق بسرعة وبعدت عنها وأنا ببصلها بحدة! مش هتتغير أبدًا هي السبب في زراعة حبه جوة قلبي من صغرى ورعرع وكبر مع الأيام لأنها كانت بترويه بكلامها وتصميمها إنه بيحبني وإننا لايقين على بعض! سألت نفسي كتير ليه مختارتش حاتم أو كريم! ليه حازم بالذات! لكني مرسيتش يوم على بر.
مرت الأيام بعد اليوم ده وكل ليلة بفكر في حازم وبتخيل اليوم اللي هيتقدملي فيه، وبفكر هلبس ايه وهحط مكياج ولا لأ! كنت بفكر فيه بالنهار واحلم بيه بالليل، مرة في الحلم يقولي: – بحبك… ومرة يمسك ايدي، ومرة يحضـ,,ــــنني، ومرة يجيبلي وردة ومرة يجيبلي ساعة… وفي حلم من الأحلام الكتير دي قالي جملة عمري ما هنساها، بص في عيني وقال: – الشمس نجمة بتضيء وتدفي حياة الناس وإنتِ النجمة اللي منورة ومدفية قلبي…
كنت بستنى وقت النوم بفارغ الصبر عشان أشوفه، وكل يوم حبه يزيد جوة قلبي ومشاعري تتحرك أكتر رغم إني مشوفتهوش في الحقيقة لإسبوع كامل لكنه مفارقش أحلامي… وفي يوم صحيت من النوم وأنا في غاية السعادة والنشاط بعد الحلم اللي شوفته امبارح إن حازم اتقدملي وصحيت من النوم بعد ما زغردت وكنت واقفة وسط زغاريد كتير والفرحة مالية الحلم… فسرت المنام على جوجل وطلع إنه هيتقدملي قريب وفيه سعادة هتدخل حياتي، تفسير جوجل ده غريب جدًا كل ما أبحث عن تفسير منام يقولي هتتجوزي قريب!
قومت عشان أنضف الشقة لو إحنا مش في رمضان كنت هسمع أغاني رومانسية زي ما كنت بعمل وأتخيله في كل أغنية، رغم إني يبان عليا ملتزمة ومش بغلط إلا إني بغلط عادي لكن ربنا ساترني… شغلت أنشودة مشاري ورددت معاه وهو بينشد وكأن حازم اللي بيقولي: – اوعديني… اوعديني تعلميهم كل حاجة حلوة فيكِ ولو في يوم قصرت فيكم كمليني بالرضا… اوعديني ياخدوا اخلاقك عشان بتباهى بيكِ ويطلعوا ذرية صالحة يزرعوا الخير في الحياة. أيوه كنت وصلت لمرحلة الذرية الصالحة!
ومر اليوم وأنا برفرف بالسعادة… لحد ساعة الفطار كنا قاعدين على السفرة فرن تلفون والدتي برقم خالي، قلت في نفسي أكيد الحلم هيتحقق وهيكونوا جايين يتقدمولي، ولما أمي قالت: – أيوه يا حازم… ابتسمت لما سمعت اسمه فتحت وداني كويس لكن اختفت ابتسامتي لما قالت أمي: – النتيجة ظهرت؟ وشروق عملت ايه! لا حول ولا قوة إلا بالله… لما أمي قالت كده قومت من على الأكل ودخلت أوضتي مستنتش أسمع حاجة تانية، أصل لو رد فعلهم على شروق لا حول ولا قوة إلا بالله، فأنا نفس مستواها ومجاوبين زي بعض ومراجعين مع بعض!
