تفك النحس 1
قعدت أعيط، وأمي بتنادي عليا، وجت تخبط عليا وتقول: – هاتي رقم جلوسك يا نجمة! قلت بعياط: – لأ مش عايزة أعرفها. قعدت أعيط، ومحستش بنفسي إلا وأنا بصلي ركعتين وبدعي ربنا في كل سجدة: – يارب محدش يشمت فيا ولا في أهلي… وبعد شوية خبطت أمي عليا وهي بتقول بفرحة : – افتحي يا دكتوره نجمة… نتيجتك ظهرت ورفعتي راسنا… فتحت بسرعة وأنا بسأل: – كام؟ جبت كام؟ ورغم إن مجموعي مكنش زي ما بتمنى إلا إني كنت زيادة عن شروق حاجة بسيطة …
سجدت شكر لله مش عشان أنا فرحانة بالمجموع على قد ما فرحت إن محدش هيشمت فينا وكنت أقصد بده مرات خالي! قال والدي بزعل: – إنتِ فرحانة عشان جبتِ أعلى من شروق! بس الله أعلم هتلحقي كلية ايه! – لـ… لأ أنا مش فرحانة… بس أنا عملت اللي عليا! – الله المستعان. قالها والدي ودخل أوضته، فحسيت بوخزة في قلبي، يعني أنا ممكن ملحقش أي كليه أهلي عاوزينها! أيوه أهلي! ما أنا مكنش عندي أي هدف إلا إني أرضيهم…
مرت الأيام والتنسيق جابلي انا وشروق مرحلة تانية… كنت محتارة أدخل كلية ايه، التنسيق جابلي طب بيطري أو علوم أو تربية… روحت مع أمي عند خالي، ومقابلتهم مكانتش لطيفة أبدًا مش عارفة هل دي غيرة! ولا فيه حاجة تانية حتى حازم ونظراته ليا! كان متغير لحد كبير… قعدنا نتكلم مع خالي ومراته اللي مصممين إني أدخل تربية مع شروق، لأن بيطري وعلوم ملهمش مستقبل على كلامهم! حازم كان واقف في البلكونة فوقفت جنبه وقلت: – محتارة أوي أدخل ايه!
مردش ولا التفت، فقولت: – بفكر أدخل بيطري زيك! ولا ايه رأيك أعمل ايه؟! قال بعصبية: – اعملي اللي تعمليه… أنا مش عايز حد زيي… قالها ودخل من البلكونة، فوقفت لوحدي شوية وحسيت إني عايزة أعيط، عيني دمعت لأنه أول مرة يكلمني بالطريقة دي! مسحت دموعي بسرعة ودخلت من البلكونة قلت لأمي: – يلا يا ماما نروح… قامت أمي ومشينا كنت ساكتة طول الطريق، وهي مصممة وبتقنعني إني أدخل تربية ووالدي وخالي مدرسين وهيساعدونا نتوظف، كانت بتتكلم بثقة وكأن خالي المحافظ ووالدي وزير التربية والتعليم!
وطبعًا رفضت وكتبت الرغبات على مزاجي وقولت اللي يجي هتوكل على الله وأدخله وهيبقى نصيبي. شروق جالها كلية تربية وأنا ربنا رزقني بكلية علوم ورضيت بنصيبي… وفي يوم لقيت الباب بيخبط، ولما فتحت لقيت كريم قدامي، عدلت حجابي بسرعة، فقال: – إزيك يا نجمة؟ عمتو هنا ولا أنا جاي في وقت مش مناسب ولا إيه؟ شاورت لجوة وقولت: – لأ هنا… اتفضل ادخل… دخل كريم وسلمني علبة جاتوه، وسقف وقال بمرح: – يارب يا ستير اللي خالع راسه يغطيها…
