نوني
_ورد انا بحبك وأنتي عارفه ده، بس انتي بتأفوري زياده عن اللزوم، مفهياش حاجه يعني لما ف وقت ضيقه، قولتلك حاجه ضايقتك أو انتي نرفزتيني ومديت ايدي عليكي، مش لازم ندخل بابا بينا، وانا مبيعديش شويه وبروح اصالحك. بصيت له بغيظ، وضيق بيتملك مني اكتر :
_تعرف تسكت، أنت شايف اصلا ان عادي تضـ,ـربني وتشتـ,ـمني، يبقي ليه عاوزني ارد عليك، الكلام مش هيجيب فايده ، انا ياما اتكلمت، ومفيش نتيجه، شايف اهانتي عادي!، وبتيجي تصالحني قبل ما اكلم بابا، او ييجي ياخدني، فهمت ليه! مش عشان شوفت انك غلط او كدة، أنت قبل ما اقول لبابا كنت بتفضل شهر مخاصمني، لحد ما انا اللي ارمي عليك كلام، رغم أن انت اللي ضاربني، متضحكش علي نفسك يا مصطفي. _تمام انتي شايفه كده، براحتك، طلعي نفسك ملاك اكتر، وانا شيطان ولايفرق معايا ، انا نازل الشغل.
مشي ورزع باب الشقة وراه، اتنهدت بتعب، بصيت ع الشقه لاقيتها عاوزه ترميم من الأول، هدوم في كل مكان وتراب، زي كل مره برجع الاقيها مغاره، دخلت غيرت هدومي وبدأت حملت التنضيف. _________________ _اااه، خلاص يابابا، خلاص والله آخر مره.
صرخت بيها من كل حته في جسمي طالها الألم ، وهو نازل ضـ,ـرب فيا شويه بالاقلام وشويه برجله، وماما واقفه وراه عماله تعيط، ومش قادره تعمل حاجه، لما حاولت تتدخل كان هيسبني ويضـ,ـرب فيها هي، وهي تعبانه ومش حمل ضـ,ـرب وبهدله، اترجتها متتدخلش، وهو مع صراخي وعياطها، متهزش ولا وقف اللي بيعمله، وده كله عشان سيبت الشغل، بعد ما صاحب الشغل حاول اكتر من مره يتحرـ,ـش بيا، وآخرها النهارده لما هددني صريحة، ياما أخضعله بمزاجي، ياما امشي وميشوفش وشي، ومشيت، مشيت رغم اني عارفه اني هرجع الاقي الضـ,ـرب والبهدله مستنيني، واهو من ساعة ما رجعت وقولتله وهو نازل في ضـ,ـرب، حتي
مسألش سيبت الشغل ليه، لو كنت اعرف اني لو قلتله السبب هيحل عني، كنت عملتها لكن هو مش هيفرق معاه، المهم الفلوس اللي هتنقطع بعد ما سيبت الشغل، أنا علياء، وميغركوش اسمي أنا مخدتش من اسمي أي صفه فيه، طول حياتي منداسه، مهو لما اللي يقل منك ويهينك يكون أبوكي، أول حد في حياتك، اعرفي انك هتفضلي كده طول عمرك، لما ابوك يهينك مستنيه مين يعزك يا حزينه!، هتستغربوا طريقه كلامي!
