نرمين من38-50
أيوه عجباني شخصيتها ، إزاي عرفت تعيش مع أبوكي و نسوانه ؟ وعرفت تأمن مستقبلها ، و بتشتغل بما يرضي الله. دا المعلم مابقاش يعمل خطوه الا بشورتها، و كمان البنت أخلاقها عاليه جدا، غير انها حلوه. إبقي خلي عندك دم و خليكي زيها. و أخذ المخده و طلع ينام بره. الفصل 47 الدكتور : إعمل التحاليل دي علشان نشوف الأسباب. المعلم : هبقى كويس يا دكتور ، دا انا على ذمتي 3 نسوان بعيد عنك.
الدكتور : بس يا معلم الفحوصات الأولية بتقول إنك في بدايه عجز جنسي. المعلم : يعني إيه يا دكتور ؟ والنبي بالراحه عليا علشان أفهم. الدكتور : العجز الجنسي يعني ولا مؤاخذه ، مش هتقدر تمارس حياتك مع النسوان اللي على ذمتك. المعلم : يا سنه سوخه!! يا فضحتك يا سعد ، دي نوال تفضحني في الحاره كلها . يعني خلاص مابقتش راجل خلاص ؟؟
الدكتور : إهدا يا معلم ، إحنا لسه ما تأكدناش ، ده مجرد تخمين على اللي حكيته . هديك منشطات و مقويات تاخذها بانتظام. وضروري تعمل التحاليل دي و تجيلي الأسبوع الجاي ، و الأفضل الفتره دي، ماتقربش من أي وحده علشان نفسيتك. المعلم طلع من عنده مصدوم. راح عند زهره. رن الجرس، فتحت له الباب. زهره : خير يا سعد؟ مفاتيحك فين؟؟ سعد : إلحقيني يا زهره. زهره : مالك؟ فيك إيه؟ أدخل كده.
دخلته لحد أوضه النوم، وقلعته الجزمه . المعلم : ربنا يباركلي فيكي يا زهره. زهره : ربنا يخليك. احكيلي فيك إيه؟ حد منهم كلمك ؟ المعلم : ياريت، أنا في مصيبه ثانيه . زهره : يا ساتر يارب! خير؟ المعلم : مش خير يا زهره ، انا مابقتش راجل . زهره : إزاي؟ مش فاهمه ؟ المعلم حكى ليها كل حاجه. زهره : يا سعد، هو قالك شاكك، مش متأكد. وبعدين الموضوع علاقته إيه بإنك مش راجل ؟ إنت معلم كبير، و الكل عامل ليك ألف حساب.
المعلم : إنت صغيره يا زهره و مش هتفهمي. الرجوله هي الموضوع ده. أعمل إيه أنا مع نوال ونانسي؟ أنا كده كده بالعافيه بقرب منك. إوعي تكوني فاكره إني مش فاهمك ولا عارفك، أنا سايبك على راحتك، عارفه ليه؟ لأني بحبك يا زهره. مش حب عادي، لا لا، إنت انقذتيني من حاجات كثير، وقفتي معايا في أزمتي، ساعدتيني و وقفتي المحلات على رجليها، أمنتك على أسراري، طلعتيني من الناس اللي ماتعرفش ربنا، صفيتي فلوسي من الحرام ، ووقعت الوقعه السودا.
