نرمين من38-50
وداد : بحاول افهمك و مش عارفه ، إنت ازاي طايقه الراجل ده بعد كل اللي عمله ؟ مش فاهمه ازاي بتنامي معاه ؟ إزاي مستحمله ضرايرك الستات السو دول ؟ إزاي نسيتي علي ؟ زهره : اللي باعني بعته ، ودا نصيبي ، والمعلم مش وحش . أهو الحمد لله بقى عندي محلات ، و مأمني على ماله و حاله، وآخر مره تتكلمي في الموضوع ده . روايات وداد : حاضر يا ختي .
شويكار راحت عند نرمين… شويكار : جوزك فين؟ نرمين : راح عند طنط فيروز . شويكار : و مارحتيش معاه ليه؟؟ نرمين : في إيه يا ماما ؟ هو انت زهقت مني ؟؟ شويكار : إنت ليكي عين تسألي في إيه؟؟ مش مكسوفه من نفسك ؟ قاعده طول الوقت تبصي لطارق و تتنهدي ، و لا احترمتي خالتك ولا جوزك اللي شاف كل حاجه ، وانا متأكده إنه حس، حبك لطارق باين و مفضوح .
نرمين : أهو إنت قلتي حبي ليه باين ، أعمل إيه اشيل قلبي من مكانه ازاي ؟ جواز و اتجوزت ، ووائل مش راجل وحش ، بس مش قادرة أحبه ، ولا هو قدر ينسيني طارق . هو انت فاكره إني مبسوطه بحالتي دي؟ أعمل إيه يا ماما؟ بتعذب، والله العظيم بموت. وانهارت عياط… شويكار : يا حبيبتي مش عارفه أقولك إيه ؟ إيه الحب ده اللي يخليكي مجرمه و تظلمي نفسك ؟ دا مش حب ، ده مرض . أعمل إيه؟ يا خوفي لا جوزك يطلقك .
نرمين : أنا مش مجرمه ، بنتك اللي مجرمه و وهي عارفه إني بحبه . شويكار : الصبر من عندك يارب. قوليلي هتقعدوا قد إيه في مصر ؟ نرمين : مش عارفه؟ شويكار : طيب مافيش حاجه جايه في السكه؟ نرمين : مش حامل يا ماما، و رحنا للدكتوره قالت كله تمام . شويكار : أسيبك تنامي وترتاحي، و بكره روحي عند جوزك، و إوعي تسيبيه. في نفس الوقت كان وائل قاعد في البلكونه، أمه جابتله فنجان قهوة.
فيروز : إتفضل يا بني. وائل : تسلميلي يا ست الكل . فيروز : انت متخانق مع مراتك؟ وائل : يا ريت يا ماما، كان أرحم من العذاب اللي أنا فيه. فيروز : هو في حد بيفرح إنه بيتخانق مع مراته ؟ افتحلي قلبك د، هو أنا اخترت لك غلط؟
وائل : أنا أصلا كنت ناوي أحكيلك علشان تنصحيني يا ست الكل. بصي نرمين بنت كويسه ، واختيارك كان كويس . نرمين أنا أول راجل في حياتها ، و أول راجل يلمسها ، بنت كانت محافظه على نفسها جدا جدا ، ولا كان ليها أي علاقه مع أي حد ، يعني أنا أول راجل ترتبط بيه . فيروز : ماشاء الله ، هو دا اللي سمعته عنها ، وعلشان كدة واخترتها لك.
