نرمين من38-50
سميره : يا ماما حياتنا اتقلبت ، و محمد على طول بيشكر فيها ، خايفة لا يكون بيحبها ، وكمان بتسرق كريم ، و سيطرت على المعلم و على فلوسه . رحمه : حقها وحق شبابها ، و بعدين هي مراعيه مصالح أبوكي ، وخيره زاد . أما محمد بيحبك ، بس إنت كده بتلفتي نظره للموضوع ده ، وكمان هي مش شغاله معاه ، بتيجي مره مره عنده ، يا سميره حافظي على جوزك و كفياكي نكد بقى .
سميره : الحمد لله يا ماما ، بس أنا صعبان عليا علي . رحمه : علي اختار طريقه . أما بالنسبه لكريم فا بقى مدمن مخدرات ، وفعلا بيسرق أبوكي . و زهره اللي مش عاجباكي عمرها ما اشتكت و لا فضحت أخوكي . سميره : خلاص يا ماما . رحمه : إوعى تظلمي حد ، و حافظي على بيتك و جوزك . و يارب يفرحني بفرح . سميره : مش عارفه يا ماما، بس فرح مش مبسوطه .
رحمه : مش عارفه اعمل ليها إيه ؟ مراد بيحبها . سميره : يا ماما أهله مش طايقينها ، وخاصة أبوه . رحمه : آه يا حرقة قلبي على عيالي !! أعمل إيه بس يارب وانا لا حول ولا قوه ليا ؟ سميره : أرجوكي ماتقوليش كده ، حسك في الدنيا معانا . نوال كانت بتكلم نانسي… نانسي : بقولك إيه يا نوال ، هو المعلم كويس ؟
نوال ارتبكت.. نوال : أيوه ، بتسألي ليه ؟ نانسي : بقولك إيه يا نوال، بلاش تخبي عليا ، المعلم بقاله كثير ماقربش مني . نوال : عادي ياختي ، ما البت لحست عقله . نانسي : بصراحه حصل حاجه . نوال : حصل إيه ؟؟ نانسي : يعني ، في ليله كده كان بعافيه شويه . نوال : فهمت يعني ماعرفش …. نانسي : أيوه كده ، و بقى يجي و ينام.
نوال : أقولك… شكل الراجل فيص. نانسي : يعني إيه؟ نوال : يعني ياختي المعلم خلص خلاص. ما هو مارحمش نفسه، جايب بت قد بناته ، وانا متأكده إنها عملت ليه حاجه ، المعلم عمره ماكان كده . نانسي : معاكي حق ، بس إوعى تجيبي سيره . نوال : لأ ياختي ، مش ناقصين مشاكل . وبعدين ياختي اللي حصل معاكي حصل معايا كذا مره ، بس آخر مره ، لا لا ، المعلم ودع الرجوله .
نانسي : أسكتي يا نوال ، عيب اللي بتقوليه ده . نوال : عيب ليه ياختي ؟ ده حقنا ، لو كده لازمته إيه ؟ دا انا حتى شقه مش عايز يكتبها لي ، والبت المفعوصه واخده كل حاجه في عبها . نانسي : وانا مالحقتش اجيب حتى عيل يربطني بيه ، و الفلوس يادوب بتكفي المصاريف ، وانا أبويا صاحب عيا ، وعندي عيال ، و اخواتي صغيرين ، قلتله خليني أنزل أشتغل معاك رفض ، المعلم اتغير ، كان بيديني فلوس كثيره ، دلوقتي لأ .
