نرمين من38-50
نوال : أهو على يدك ، علشان ماتقوليش إني باظلمها ، أصلها صعبانه عليكي . نانسي : مش عارفه ، بس لازم يعدل بينا في كل حاجه . البت بقى عندها محل كوافير اللي كانت شغاله فيه ، و كمان بتفتح محل عبايات ، واحنا حاطين إيدينا على خدنا .
نوال : إحنا مش لازم نسكت على حقنا . رحمه ربنا رحمها من عنده ، أهي قاعده في شقة ابنها اللي بقى عنده شيء و شويات ، و كمان اللي ما تتسمى ماسكه المحلات ، ما رحمه أخذت حقها كله من المعلم ، و اجرت الشقه اللي تحت ، وبنتها شغاله . الدور و الباقي علينا احنا ، مستنين صدقه من المعلم . نانسي : ما إبنك شغال مع أبوه ، مش عارف يعمل حاجه .
نوال : أسكتي يا نانسي ، الولا راح مني . المدعوق ده لحس مخه ، كل فلوسه راحت على المزاج . نانسي : يا نوال، قلتلك داري على عيالك . نوال : أعمل إيه ؟ كلمته كثير و حاولت معاه بس خلاص السكينه سرقته . نانسي : ليه ماتخدهوش يتعالج في مصحه ؟ كلمي أخوه علي يساعدك . نوال : هههه ضحكتيني ، علي مين؟ دا بقى شايف نفسه ، دا ولا هيعبرني .
نانسي : جربي يا نوال ، مش هتخسري حاجه ، دا إبنك. و بعدين بنتك سماح ! نوال : آه يا غلبي ياني! البت بقت ترد عليا الكلمه بعشره ، و مش عاجبها العجب . نانسي : بلاش بيات بره البيت ، ده كثير مهما كان هي لسه صغيره . نوال : عارفه ، من ساعة ما فرح اتجوزت مراد ، البت حالها اتشقلب . نانسي : شوفي اللي شقلب حياة بنتك إيه؟ ماظنش إنها كانت بتحبه ، و هي مابقتش تروح الجامعه ؟
نوال : إيش عرفني ياختي ، أهي بتقول رايحه الجامعه . فضلوا يتكلموا كثير ، نوال هديت و اتصاحبت مع نانسي ، أصل مالهمش غير بعض يشتكوا خيبتهم . في الأوتيل زهره نامت ، المعلم مش عارف ينام ، فضل يفكر في كلام الدكتور ، و كلام زهره ، و نظرة علي ليه . وصعب عليه إبنه لما شاف لمعة عينيه وهو بيبص لزهره ، واتأكد إن زهره شالته من قلبها ، بس إبنه لأ .
لسه بيحبها ، و معاملته لهايدي أكدت ليه الكلام . مابقاش مستحمل ، و اتلخبط في الدوا و حس بتعب . صحى زهره أخذته الحمام رجع ، و وقع من طوله . زهره فضلت تصرخ ، و كلمت الريسيبشن يبعثوا لها دكتور و يكلموا إبنه علي . علي كان لس داخل الأوتيل ، شاف هايدي تحت . هايدي : إلحق أبوك تعبان . طلع يجري معاها ، و سمع صويت زهره . دخل لقى زهره حاضنه المعلم وبتعيط .
