نرمين من38-50
وائل : خليني أكمل . من ساعة ما اتجوزتها وانا شايف خوف في عنيها . نرمين بنت غامضه جدا جدا ، ماتعرفيش إيه اللي جواها ؟ على طول سرحانه و ساكته ، ولا بتتخانق معايا ، ولا بتعمل معايا مشاكل ، بحسها بارده جدا جدا. أول حوار صارحتني إنها مش بتعرف تطبخ ، قلت مش مشكله ، كده كده أنا باعرف اتصرف ، ما انا كنت عايش لوحدي . عدت ليلة الدخله ، حسيت كإنها كانت رافضه إني المسها، بس ما منعتنيش. بس بكائها بعدين حسسني إنها مقهوره ، وإنها مكانتش عايزه ، رغم إنها دافعت عن نفسها.
بعد كده ، بقى كله تمام. بس مش باحس إن ليها رغبه فيا، بمعني أنا اللي باطلب هي لأ . حاولت بكل الطرق أخليها مبسوطه معايا ، بتقول ليا آه إنها فرحانه، بس أنا بشوف عيونها بتقول لأ. لدرجة إني فكرت إنها تعبانه نفسيا، وفعلا أخذتها لدكتوره نفسية. صاحبي قالي دي بداية اكتئاب . قلت عادي ، أول مره تسافر و الغربه. كانت هاديه، إتعلمت تطبخ و تعمل شغل البيت ، و بتطلع و إتعلمت اللغه، حاولت اخليها تندمج،
كنت بشوفها بره وحده ثانيه، وأول ما تدخل البيت، عينيها بيبقى فيها حزن، ليه؟ معرفش. عمرها ما قالتلي بحبك ، لما سألتها قالتلي لما احس إني بحبك، هقولها. بس هقولك إيه ماما ، زعلت جدا منها، و فعلا خاصمتها ، بس صالحتني ، شفتها بتعمل المستحيل علشان اكون مبسوط ، بس في علاقتنا، هي بتأدي واجب وبس . ولما بتيجي بنتي بتاخذ بالها منها ، تهزر معاها ، وعلمتها كلمات عربي . انا مش عارف إيه المشكله ، بس النهارده اتأكدت.
فيروز : إتاكدت من إيه؟ وائل : نرمين بتحب طارق . أول ما شفناه في المطار ، شفت لهفتها إزاي ، وشها كان أحمر و داخت ، وعينها كانت بتلمع . اللمعه دي عمري ماشفتها معايا. واحنا بنتغدا ، طول القعده وهي بتبص عليه وقلبها بيدق . أنا مش حمار ، وفهمت إن قلبها مع راجل ثاني . وحتى توتر امها و خالتها ، و طارق نفسه كان بيتحاشي يبص عليها.
فيروز : إنت بتقول إيه؟ دا شيطان دخل وسوس لك. طارق ده كان جوز اختها . يمكن افتكرت اختها ، و هو إبن خالتها . لو كانت بتحبه ، تتجوزك ليه؟ وليه ماراحتش اتجوزته وتربي بنت اختها؟ هي أولى . وائل : مش عارف. بس بعد كل اللي قلته ، إنت شايفه إيه؟؟
فيروز : اللي قلته يبسط أي راجل . ست واخدا بالها منك ، و من بنتك ، وانت مش عاجبك العجب. وكمان هي مصريه، مش زي الخواجايه اللي كنت معاها، في فرق ، البنت قلت إنت أول راجل في حياتها ، طبيعي مش عارفه حاجه ، ربيها على إيدك . الحزن اللي هي فيه ، متنساش موت اختها ، و نرمين جاتلها صدمة ، الغربه جديده عليها ، وسابت امها ، كل دا مخليها كده . هنشوف واحده صاحبتي تعمل لها رقيه شرعيه ،
