نرمين من38-50
زهره : ربك كريم يا سعد. أقوم أحضرلك العشا ؟ المعلم : نفسي مسدوده ، أستري عليا يا زهره. زهره : أستر إنت على نفسك ، من ناحيتي أنا ، ليك الأمان. و نصيحه مني ، سافر يا معلم غير جو وابعد من التوتر ، و إوعى تفتح الموضوع ده مع نوال ، لا احسن مصر كلها تعرف . المعلم : إنت هتقوليلي ، ما هي اللي خلتني أروح للدكتور . بعد ماقلت لها إني تعبان أصرت على الموضوع .
زهره : شفت ، أهو انت قلت إنك كنت تعبان، فماتكبرش الموضوع . المعلم : أنا لازم أبعد ، بس هاخذك معايا، إيه رأيك نروح شرم الشيخ ؟ زهره فرحت… زهره : بجد يا سعد ؟ المعلم : أيوه، بكره نتكل على الله . زهره : مش هقدر ، وداد على وش ولاده وانت عارف مشاكلها مع حماتها ، و هي مالهاش غيري . و جوزها رجع المصحه بعد ما أمه اتهمته بالسرقه.
سعد : الوليه دي ربنا ياخذها . ماتخافيش إحنا هنروح بالطياره ، أول ما اختك تقول يا ولاده، نرجع بسرعه . زهره : شكرا يا سعد على كل حاجه. المعلم : إنت اللي شكرا على وقفتك جنبي، وإنك واقفه في المحلات ، وحتى في محلات رحمه، وبتبعتي لها الفلوس كل شهر، وبتسألي عليها. زهرة : أنا ماشفتش منها إلا كل خير ، وده حقها و رزقها. و انت اللي علمتني إزاي أشتغل ، وانت اللي اشتريت ليا محل مدام وفاء هديه .
المعلم : علشان ظلمتك يا زهرة . زهره : الحمدلله على كل حال ، نام وارتاح. هطلع اكلم وداد و ابلغها اننا هنسافر . طلعت بره إتصلت على وداد.. وداد : إزيك يا زهره ؟ زهره : الحمدلله، إنت أخبارك إيه ؟ وداد : أهوه ، مستنيه فرج ربنا. عماد حالته وحشه جدا ، حسبي الله ونعم في اللي كان السبب . زهره : قلتلك لو عايزه تطلقي أنا واقفه جنبك.
وداد : يا زهره، قلتلك أنا رضيت بنصيبي ، و بعدين عماد طيب ، مالوش ذنب إنه تعبان . والله لما كان ملتزم بالدواء كان كويس معايا ، ولا ضربني ولا أجبرني على حاجه ، لولا حماتي ربنا ينتقم منها ، عملت مشاكل كثيره لحد ماتعب. زهره : ربنا يشفيه، كنت خايفه تكوني بتخبي عليا. وداد : و اخبي ليه يا زهره ؟ هو انا ليا غيرك بعد ما أبوكي و امك قالوا يا فكيك ، الله أعلم عايشين ولا ميتين .
زهره : إنسيهم ، بكره تخلص فلوسهم و يدوروا علينا ، بقولك بكره رايحه شرم الشيخ مع سعد . وداد : و تسيبيني لوحدي؟ وانا اللي كنت ناويه آجي اقعد معاكي لحد ما اولد ؟ زهره : الدكتوره قالتلك على اخر الشهر ، واحنا في نص الشهر . أنا معاكي أي وقت تتصلي بيا اجيلك . المعلم تعبان ولازم أروح معاه .
