ليلي 2الاخير

و “يوسف” كان حاضر ، واقف مع والد العروسة و قرايبه ، كان واضح قد إيه وسيم لدرجة إن البنات واقفة تبصله بإعجاب وهو ولا على باله ، بالعكس كان واقف مكانة رزين و هادئ بشكل يخليك تحترمه غصب عنك ..

نَظرات البنات خلتني مخنوقة و مش مرتاحة في المكان ، لدرجة إني سألت نفسي : أنا غيرانة وإلا إيه ؟!

********

هي إزاي الأيام بتداوي جروحنا كده ، ننسى وجعنا ، كان موسم الشتا على الأبواب و البحر شكلهُ جميل ، أنا بحب البحر في الشتاء بيلمسني من جوه ..

-تأكلي فريسكا.

كان صوت “يوسف” اللي اتعودت عليه ، و بقى يخطف قلبي مش عارفة ليه ، “يوسف” كل يوم يثبت ليا يعني إيه راجل سوي بجد ، بيدعمني أثبت نفسي في شغلي و دراستي ، وقف جمبي و خلاني أتخطى محنتي ..

هو ليه سحر خاص بيه حتى تيتة مش بتقدر تقاومه لدرجة لما طلب منهاإني اخرج معاه وافقت فورًا ، على عكس “أحمد” كانت بتبقي قرفانة و زهقانة ..

-أنتَ جايبني هنا ليه ؟

سألته وأنا باخدها منه و أكل منها ، أما هو فوقف جمبي وقال:

-مخرجك و مفسحك و أكلتك بيتزا و شربتك عصير قصب و جايبلك فريسكا ، تفتكري هيكون ليه ؟.

بصتله بحاجب مرفوع و رَديت عليه:

-عشان تذلني مثلا ..

مَد إيده و ضربني على رأسي بخفة كده وبغيظ اتكلم:

-إيه يا بنت الدماغ الشغالة دي ، متفكريش تاني .

نفخت بضيق مصطنع وأنا بتكلم بجدية لأني حابة اعرف السبب:

-بتكلم بجد ، حابة أعرف سبب الخروجة دي إيه ؟

هَمهم وبصلي بطرف عينه ، بصته الغريبة اللي بتظهر فجأة كده في وسط الكلام وقال بسخرية:

-من غير سبب ، أنا شخص وحيد و أهلى كلهم مسافرين و معنديش أصدقاء و بما إنك صديقة الطفولة فمجبورة إنك تخرجي معايا ..

بس كده ، أنا كنت منتظرة إيه منه ! ، “يوسف” شخص عاقل بيوزن كل كلمة بيقولها فاتنهدت ورجعت أتفرج على البحر وابتسمت وقولت:

-البحر جميل .

-جدًا .

-بس على قد جماله إلا إنه يخوف .

-أكيد .

-أنا بحب اسكندرية في الشتا ، دافية و ساحرة .

-حصل .

-أنتَ مجنون .

-عارف .

ضحك و أنا كمان ضحكت ، أنا بقيت بضحك و ببتسم و بكون سعيدة و أنا معاه ، هُو إزاي ضحكته جَميلة قوي كده ..؟.

**********

كان عندنا اجتماع مع شركة تانية و “يوسف” اصر إني احضر معاه الاجتماع ، مش عشان حاجة احنا اصدقاء ، عشان انا قدرت اثبت نفسي و شطارتي في الشركة واني استحق اكون موجودة فيها .. كان اجتماع مع شركة كبيرة محتاجة اننا نعملها سيستم حماية لأجهزتها من الاختراقات و مفيش أشطر من الباشمهندس “يوسف زهران” يقوم بالمهمة دي ..