ليلي 2الاخير

-اتفضل اتكلم يوسف مش غريب و يعرف عني كل حاجة .

“أحمد” اتصدم ومِش لوحده ، دَه “يوسف” كمان لكن صَدمته خفاها واتبدلت لنظرة راحة و سَعادة طمنتني أنا شخصيًا .

إتكلم “أحمد” بعتاب وهو مش مصدق أسلوبي الحاد معاه ، فاكر إنه هيقابل “ليلى” البنوتة الرقيقة بتاعة زمان يبقى غلطان ومحتاج يفوق مِن وهمهُ:

-للدرجة دي، أنا إتأكدت إنك اتغيرتي فعلًا ، على العموم كنت حابب أعرض عليكي لو حابة تشتغلي معايا في شركتنا ، احنا محتاجين مهندسين هناك و أنتِ شاطرة في مجالك و هتكون فرصة العمر ليكي .

خَبيث “أحمد” ، عايز كل حاجة تكون ليه وتحت عنيه ..

ابتسمت لُه بتكلف و أنا بقول بنبرة عَادية صارمة ، نَبرة اتعلمتها عشان أحط حدود للمُتطفلين أمثاله:

-مُتشكرة على عرضك بس أنا مرتاحة هنا و مش بفكر أسيب الشركة دي ولا شغلي مع يوسف .

أَنا بقيت بَحب نظرة “يوسف” ليا كُل ما أعمل حاجة ..

رَجعت انتبهت لـ “أحمد” وهو بيحاول يقنعني بكلامه و نَبرة الغرور اللي حسيتها في صوته ضايقتني:

-فكري تاني أنا هعطيكي مهلة كام يوم تفكري في العرض..

غَمضت عيوني أتمالك أَعصابي قدام الكائن العَجيب ده ..

فتحتها و بَصيتله بحدة و ثَبات انفعالي أُحسد عليه والله وأنا بقول:

-مش محتاجة أفكر أنا قولتلك قراري من غير تفكير ، أنا مش هسيب الشغل مع يوسف أبدًا .

بَعدها التفت لـ “سارة” اللي كانت وَاقفة متابعة الحِوار مِن البداية بصمت ..

هِي إزاي مستحملة اللي حصل دَه ، أَنا لو كنت مكانها كُنت وَلعت الدنيا ..

لَكن نظراتها الحقودة و الغَيورة جَمدتني ، ساعتها عِرفت إنهم لايقين على بعض ، على رأي المثل حِلة و لاقت غَطاها ..

ابتسمتلها ببرود وقولت:

-مِنورة يا مدام سارة.

اتحركت “سارة” بعَصبية ، الواضح ابتسامتي حَرقتها جامد فمسكت دراع “أحمد” وقالت بانفعال:

-يلا يا أحمد .

زوج الشمبنازي اتحركوا و مِشيوا من المكان ، المقابلة دي كانت غَريبة ، كأنها انتقام لمشاعري على الوجع اللي سببوه ليا .

كانوا فاكرين إنهم هيعيشوا حياتهم طبيعي و أَنا هبكي على الأطلال ، مُغفلين .

-حاسة بإيه ؟.

جَاء صوت “يوسف” المُريح بسؤاله ليا فابتسمت و بَصتله بعدين اتكلمت:

-ولا حاجة ، هتصدق لو قولتلك إني لما شوفته محستش تجاهه بأي حاجة غير إنه زيه زي أي غريب ، في البداية اتفاجئت بوجوده بس وجودك جمبي طمني وخلاني أثق في نفسي .