رواية جديدة

الفصل الاول

في تمام الساعه الرابعه عصرا في مطار القاهرة الدولي وصلت الطيارة القادمة من نيويورك و وصل عليها الدكتور معتز البحيري وقف قدام المطار قدام عربيه نزل السواق منها بسرعه اول ما شافه وهو بيرحب بيه

محمد السواق :

_ حمد لله علي السلامة يا دكتور معتز نورت مصر كلها يا باشا

معتز ابتسم بود :

_ الله يسلمك يا عم محمد شكرا

محمد :

_ غاليه هانم من بعد الفجر وهي مصحيه الكل وبتحضر لاستقبال حضرتك والفرحة مش سيعاها

معتز :

_ يااا للدرجة دي

محمد :

_ طبعا يا دكتور دا حضرتك غايب بقالك تلت سنين بحالهم هما يوم ولا يومين

معتز ابتسم من غير كلام وبص من الشباك يتفرج علي البلد واللي اتغير فيها وسرح في اللي حصله من تلت سنين وخلاه ساب البلد كلها ومشي افتكر اليوم اللي ساب فيه حبيبته ومراتة افتكر الوجع والقهره اللي حس بيهم

فلاش باك ….

معتز بصدمة :

_ نعم !! سمعيني تاني كدة انتي قولتي ايه ؟

رنا بدموع :

_ لازم نتطلق يا معتز لازم نبعد عن بعض

معتز بحيرة :

_ رنا في ايه !! انا زعلتك في حاجة يا حبيبي ؟ انا انا مش فاكر ان صدر مني حاجة تضايقك بس لو حصل وانا مش واخد بالي عرفيني وانا اراضيكي

رنا ببكاء ووجع :

_ عشان خاطري متصعبهاش عليا اكتر من كدة عشان خاطري طلقني بهدوء كل اللي اقدر اقولهولك ان مش هينفع نكمل مع بعض مش هينفع طلقني وإنساني

معتز بعصبيه :

_ هو ايه اللي مش هينفع هه … يا تتكلمي عدل يا هعتبر انك اتجننتي ولا كاني سمعت حاجة من أصله

رنا بوجع :

_ ايه يا دكتور هتعاملني علي اني مريضه نفسيه زي المجانين بتوعك ولا ايه ؟

معتز :

_ رنا انا لحد دلوقتي مش عايز اتعصب عليكي فهميني في ايه انا يادوب لسه داخل البيت بعد غياب يومين ايه اللي حصل فيهم قلبك كدة عليا وخلاكي عايزة تتطلقي ؟

رنا :

_ قلتلك مفيش غير أن دي رغبتي أنا مش عايزة اعيش معاك طلقني بقا طلقني بدل ما ارفع عليك قضيه خلع وتبقي سيرتك انت وعيلتك علي كل لسان طلقني يا معتز وخلصني منك بقا

معتز بوجع :

_ رغم أن انا واثق من الوجع اللي ف صوتك ونظرة عينيكي أن في سبب وسبب كبير كمان الا ان كلامك جرحني يا رنا وانتي من يوم ما حبينا بعض عارفه أن الا كرامتي مهما كانت الأسباب ..