فاطمة 10
ثم أشارت إلى الغرفة التي توجد بها ابنة زوجها، وأردفت مؤكدة:
رنا خلصت المدرسه وجت على هنا علطول بعد ما عدت على خالتها.
_ وأنا المفروض أصدق بقى الفيلم الحمضان ده؟
سألها باستهزاء، فقابلت سخريته بحدة قائلة:
تصدق ولا متصدقش يا “عبد الكريم” ميخصنيش، البت فاضلها سنه وتخلص الفني وهي عايزه الواد وهو شاريها، وجالك مره واتنين وتلاتة وطلب يخطبها
وتابعت بضيق، بعدما طفح بها الكيل من تصرفاته:
بس أنت عايز ترميها للكلب اللي هيدفع أكتر وكل شوية ترجع “علي” مكسور الخاطر، شويه تقوله دي لسه صغيرة، وشويه تطلب منه حاجات أنت عارف إنها مش في قدرته، ومسيب “راضي” على البت في الرايحة والجاية يمد إيده عليها.
لم يتقبل “عبد الكريم” اتهاماتها لابنه، فاندفع يدافع عنه باستماتة، مهاجمًا إياها:
أخته ومن حقه يربيها، زي ما أنا كده حقي أربيكي يا “أميرة” وأكسر عضمك كمان علشان واقفة بتبجحي فيا كده وأنتِ غلطانة.
ارتفع صوتها وهي تواجهه دون تراجع:
تعالى يلا كسر ووريني أصل شكلك نسيت ساعة ما عملتها أخر مره أنا عملت فيك إيه
ثم أعادت إلى ذاكرته ما حدث بينهما قبل سنوات، متابعة بلهجة تحمل الكثير من التحدي:
المره اللي فاتت أنا محبستكش لأجل خاطر بنتك اللي قعدت تعيط أول ما خدوك على القسم وتتحايل عليا، وفضلت على ذمتك بعد ما لفيت ورايا السبع لفات يا عبد الكريم ووسطت طوب الأرض علشان أرجع
ابتسمت باستهزاء ثم أضافت:
كررها بقى تاني علشان المره دي مش هتشوف وشي خالص.
_ طبعا ما أنتِ قلبك قوي بعد ما أختك اتطلقت وبقى عندها قرش.
قالها بتبجح، وهو يرمقها بنظرات مهينة، فاشتعل غضبها وردت عليه:
قلبي جامد من زمان يا “عبد الكريم”، ولا قرش أختي ولا قرش عشرين زيك هيقويه.
ولم تنتظر منه ردًا، بل واصلت حديثها مستعيدة ما قدمته له يومًا من أجل مساعدته على تحقيق حلمه:
ولو كنت زي ما أنت بتقول مكنتش بيعتلك اللي كان حيلتي كله علشان تفتح ورشتك.
ظهر الاستحقار جليًا في عينيها وهي تنظر إليه، ثم تابعت:
بس أنت عمرك ما هيطمر فيك، والغلط كان غلطي أنا لما صدقتك.
تنهدت بضيق ثم سألته:
فاكر يا عبد الكريم ولا أفكرك؟
وبدأت تسترجع معه تفاصيل تلك الفترة، حين توفي والد ابنها ووجدت نفسها في مواجهة ظروف قاسية، بينما لم يكن أمامها سوى البحث عمن يساعدها:
فاكر لما أبو ابني اتوفى وجيتلك أطلب منك بعدها بكام شهر تكلم المفتري صاحب الشقة اللي كان عايز يطلعني منها وأنا على إيدى عيل حتة لحمه حمرا قولتلي ايه؟
