فاطمة 10

ابتسمت بمرارة، وهي تستعيد السبب الذي جعلها تتخلى عن آخر ما تملكه من ذكرى أمها:
علشان تبقى أسطى قد الدنيا متشتغلش تحت إيد حد، وقولتلي هعوضك يا “أميرة” وصدقتك “أميرة” ومطالتش منك حاجه.

لم يحتمل “عبد الكريم” المزيد من عتابها، فقبض على ذراعها بغلظة، بينما أغمضت عينيها للحظة من شدة التعب قبل أن تسمعه يقول:
أنتِ بتعايريني؟ هي الورشة دي لما اتفتحت خيرها بيصرف على مين؟ مش أنتِ وابنك ضمن اللي عايشين بفلوسها؟

_ ما هو ده اللي ناقص، أصرف على نفسي كمان وأنا متجوزاك.

قالتها بسخرية، ثم استأنفت حديثها بنبرة حاسمة:
أسمع يا عبد الكريم أنت خلاص مبقتش تلزمني، وعيالك كبروا، “راضي” أهو كسر العشرين، و”رنا” لولا السنتين اللي قعدتهم لها بالغصب كان زمانها خلصت المعهد…يعني محدش محتاجني هنا.

نظرت إليه بثبات، ثم ألقت عليه قرارها الذي لم تعد مستعدة للتراجع عنه:
أنا عايزه اتطلق.

انطلقت ضحكاته الساخرة، وكأنها أخبرته للتو بنكتة لا تستحق سوى الاستهزاء، قبل أن يسألها باتهام:
تطلقي؟ أنتِ قولتي بقى الراجل بيكبر ومحدش ضامن، أحسن يطب ساكت الصبح ساعتها ابنه هيكوش على كل حاجه وهطلع من المولد بلا حمص فألحق من دلوقتي أطلق منه وأخد اللي وراه واللي قدامه بحجة المؤخر والـ…

لم تتركه يُكمل اتهاماته، وقاطعته بحدة:
اللي يسمعك وأنت بتتكلم كده يقول إنك كاتبلي مليون جنيه مؤخر، ده أنا اتجوزتك ببلاش يا عبد الكريم.

ثم تابعت:
بس عندك حق، أنا مش هتطلق غير لما أخد كل مليم ليا في ذمتك، علشان لو جرالك حاجه زي ما أنت قولت متشحططش أنا والواد.

_ أنا طالع شغلانة أنا وراضي عايز لما أرجع منها تكوني عقلتي وبطلتي تهلفطي بكلام ملوش لزوم.

لم تتراجع أمام تهديده المبطن، بل واجهته متحدية:
وأنت تعرف إن أميرة بتقول كلمه وترجع فيها؟

ابتسم “عبد الكريم”، وربت على كتفها محاولًا إنهاء الحديث بطريقته المعتادة، وقال:
أعرف إن أميرة عاقلة ومش هتخرب بيتها، وإذا كان على حلقك ولا سلسلتك اللي بيعتيهم زمان لما ربنا يكرم هجيبلك غيرهم، أكتر من كدا متحلميش.

ثم استدار متجهًا إلى الخارج، وغادر المنزل دون أن يكترث لندائها الغاضب من خلفه:
لأ هحلم يا عبد الكريم، وهتطلق وهاخد كل قرش ليا من حبابي عينيك الاتنين.

انتشل “أميرة” من شرودها في ذكرياتها أصوات السيدات الجالسات في منزلها لتقديم واجب العزاء في زوجها، فالتفتت إحداهن إليها وقالت بمواساة:
شدي حيلك يا ست أميرة، متعمليش في نفسك كده.