سهيل 2الاخير

أرجع ظهره للخلف رافعاً ساقه فوق الأخرى قائلاً (بس دكتور شاطر) خبطت بكفها على سطح المكتب قائلة بحنق (إنجز وقوللي إيه الحكاية)

انتفض بخضة طفيفة قائلاً (مش أسلوب دكاترة ده على فكرة) .. ضيقت نظراتها بحركة تحذيرية ولم ترد بينما أمسك هو بأحد الملفات ليفتحه متابعاً بجدية (أول حالة جاتلي المركز هو أيمن زوج هالة.. كان بيعاني مبادئ متلازمة cotard delusion أو الجثمان السائر.. طبعاً إنتِ عارفة اللي حصل معاه وللأسف بعد ما مراته سابته وطلبت الطلاق صحته النفسية إتأثرت بشكل كبير جداً).. صمت لثواني يرتب أفكاره وأضاف (صدماته كانت قوية.. أولاً موت بناته وبعد كده موت أخته وإبن أخوه وأخيراً حسم هالة لموقفها إنها خلاص هاتسيبه وهاتروح لغيره..

كل ده خلاه يحس إنه لوحده وبدء ينكر وجوده ويتوهم إنه مات..ولحسن حظه إن أخته الصغيرة زميلة أختي فالجامعة وهي اللي شرحتلي حالته و قدرنا نتجاوز الخطر لأن المتلازمة كانت لسه فأولها) .. عقد ذراعيه مستطرداً (واتحسن بمضادات الإكتئاب وجلسات الاستجواب وحالياً بيمارس حياته بشكل طبيعي إلى حدٍ ما) تحدثت زمردة بإشفاق (المتلازمة دي صعبة أوي وكويس إنه مادخلش فمرحلة الفُصام) أكّد على كلامها (الحمدلله لأنه كان بيستجيب للعلاج)… تناول الملف التالي ثم فتحه قائلاً (سهيل صاحبي من أيام المدرسة وكان بيتعالج عندي من قبل ما يلاقي رودينا)..

سألته بعدم فهم (إزاي؟) أجابها موضحاً (هروب مراته وفقدانه للأمل إنه يلاقيها سبب له نوع من أنواع الإكتئاب اسمه اضطراب الإحكام.. سلوكياته كلها اتغيرت بسبب الضغط النفسي و انفعالاته العصبية بقيت قنبلة موقوتة.. دايماً مرهق وبيعاني صعوبة فالتركيز و ذاكرته إتاثرت بشكل ملحوظ .. ولما حس إنه بدء يفقد سيطرته على نفسه جالي العيادة وهو منهار جداً ومازال بيتعالج لأن الحالات دي بتنتهي معاناتها مع إنتهاء أسباب الحزن وللأسف سبب حزنه مازال قائم)

إستندت بمرفقيها على المكتب قائلة (مرضى اضطراب الإحكام بيتحسنوا بجلسات الاستجواب لأنهم بيكونوا محتاجين للكلام والتعبير عن مشاعرهم)

ابتسم قائلاً بثقة (حالة سهيل كانت متقدمة شوية واحتاج تدخل دوائي) …فتح الملف الثالث يقول باهتمام (نيجي بقى للأستاذ اللي كان تحدي صعب جداً وخدنا وقت ومجهود رهيب لحد ما حالته استقرت).. صمت لثواني يسترجع ذكرياته أثناء علاج بدر والذي كان يمر بفترة معقدة للغاية ثم تحدث بتركيز (بدر كان بيعاني من هلاوس سمعية وبصرية و hypnagogic .. نتيجة خلل في الناقل العصبي دوبامين .. اللاوعي عنده إتأثر بحادثة القت’ل اللي ارتكبها ونقله كل الذكريات السلبية على شكل تهيؤات)