حازم 1

حطت أيدها على قلبها و قالت بابتسامة باردة:

_ دلوقتي قلبي ارتاح لما شوفت أبني و مع مراته الاولى و التانية، كده اطمأنت على أبني.

كانت تبص ليها من غير اي ردة فعل ، مش مستغربة الشماتة اللي في عينها هي عارفة من أول يوم إنها مش عايزة الجوازة دي، و حازم اللي غصب عليها تقبل بيها، لكن هي مقبلتش بيها حتي بعد سنين.

كملت صباح و هي قاصدة توجع قلبها:

_ أنا عارفة انك زعلانة، بس لو فكرتي صح تعرفي ده في مصلحتك قبل مصلحة حازم، و اللي مش عارفه تعملي نوار تعملوا.

: هو أنتِ ليه بتكرهني كده؟

كان سؤال أمل و هي تبص في عينها، بصت صباح في عينها و قالت ببرود :

_اخس عليكِ أنا مش بحب غيرك يا قلبي.

ضعفت و نزلت دموعها و سألت:

ـ لو بنتك كانت مكاني.

قاطعة كلامها و هي تصرخ:
_بعد الشر علي بنتي، أن شاء الله اللي يكره، ايه يا أمل تتمني الشر لغيرك.

: اللي حصلي مش شر ده خير و أنا راضية، و أنتِ متأكدة عمري ما اتمني الشر لاي حد حتي هو لو كان الشر نفسه.

= قصدك مين بكلامك.

: قصدي اقولك مبروك.

و مشيت من قدمها.

كانت نوار تمـ,ـوت من الفرحة مش مصدقة أن أخيرا حب السنين من أيام ما كانت في الثانوية العامة و هي بتحبه و لحد ما خلصت الجامعة فضلت تحبه و رفضت كل العرسان لأن قلبها ملكِ حازم..

كانت صدمتها لما حازم خطب و اتجوز غيرها، لكن ربنا جبر بخاطرها و بقا جوزها حتي لو في واحدة تانية…..

أما هو كان مغمض عينه و بيفكر في أمل مش شايف غيرها قدمه.

كانت وصلت لعندهم و شايفهم و هما مش حساسين بللي حواليهم و كأنهم في دنيا تانية….

بصت عليه لقت ابتسامة جميلة و هادية، هي عارفة الابتسامة دي لما يفكر فيها ، ديما كان يسرح بخياله مع ذكرياتها حتي و هي جنبه.

قالت بدموع ممزوجة بابتسامة مكسورة:

_ بتحبني يا حازم صح.

في الاول افتكر أن صوتها خيال ، لكن فتح عينه لما حس بلمسة أيدها المميزة و هي تقول بنبرة حنونة:

_ أنا هنا، أفتح عينيك يا حبيبي.

فتح عيونه و بعد عن نوار بصدمة و بص لها و بعدين بص للأرض بخجل.

بصت نوار على أمل و اتحركت من قدمهم من غير كلام أو ردة فعل.

وافقت الموسيقى و الكل متابع اللي يحصل.

وقفت قدمها و سألت:

_ ليه يا حازم ، ليه يا حبيبي كنت قولي ،ليه تعمل في كده.

كان ببص في الأرض مش قادر يبص في عينها.

أما هي كأنها مسكت نفسها لحد ما تكون قدمه و بعدين تنهار ، حست أن في دوشة كتير حواليها ، رغم الصمت الطاغي على المكان.