ابراهيم 1

حسين كان خلاص بيقتنع بكلامها لحد ما لقي حماته داخله عليه و في اديها عياله اللي أول ما شافوا أبوهم جريوا عليه
أم إبراهيم و ابنها حسين بصوا لأم سوسن اللي قالت:-
عيالك عندك أهم اديهم لأمك تربيهم و ورقه بتني توصل لبيت أبوها اه إحنا ميشرفناش النسب دا ، إنت واخد بنتي من بيت كانت متصانه فيه طول ما هي قاعدة عشان تجبها لأمك هنا تهينها ، لا يا حبيبي أنا بنتي تلزمني

حسين بص لاولاده اللي بيتابعوا الحوار و تدارك الأمر و قال:-
طب دقيقة واحدة يا حماتي الله يكرمك
و اخد أولاده و خل بيهم على أول اوضة قابلته

أم إبراهيم استنت لحد ما ابنها دخل و بصت لأم سوسن و قالت:-
مالك يختي كدا داخلة بصوتك علينا ، اية مفيش حد قادرك
أم سوسن كانت اذكي منها و عرفت انها بتجر مشاكل معاها عشان تغلطها فقربت منها و قالت بهدوء:-
لا محدش قادرني غير ربنا و بعديه جوزي إنت بقي اية ؟!
طبطبت على رجليها بحدة و قالت:-
بصي بقي يا حبيبتي جو الحما اللي عاوزة تعملية على بنتي دا ميكلش معايا بربع جنيه ، حق بنتي وأنا هعرف اجيبه كويس و لو عاوزكي تيجي تبوسي على رجلها هجيبك راكعة بس أنا عشان بنت أصول مش هعمل كدا

أم إبراهيم بصت ليها بغيظ و قالت:-
اللي هتيجي راكعة دي هي بنتك و من وراها إنت عشان ابني ميطلقهاش و تبقي مطلقة

ضحكت أم سوسن بصوت مرتفع و قالت:-
يظهر عليكي كبرتي و سمعك تقل يا حبيبتي ، أنا اللي بقولك أهو طلقوا بنتي مش هعيش مع واحدة زيك ، و لجل عيونها بنتك تجيلك مطلقة تاني يوم
أصل إنت متعرفيش إن حماه بنتك دي تبقي اختشي حبيبتي و مش بتكسرلي كلمه

أم إبراهيم بصت للموضوع بشكل تاني وإنها كدا هتشوشر على بنتها فضحكت و قالت:-
لية بس كدا يا أم سوسن يا حبيبتي ما إحنا بنتكلم

أم سوسن بصت ليها بسخرية و قالت:-
قصر الكلام عاوزين الموضوع يتلم إنت و ابنك تيجوا تحبوا على رأس بنتي و تبوسوا اديها كمان و تطلبوا منها السماح و هي بقي براحتها يا ترضي يا ترفض

نزلت لمستواها شوية و قالت:-
احسنلك يا أم إبراهيم تسمعي كلامي و متزعلنيش عشان أنا زعلي وحش و مبحبش اعيد كلامي مرتين

باااك

أم إسماعيل بصت ليها بحدة وقالت:-
والله إنك ولية سو يعني عشان بنتك مش قادرة تتكلمي مع سوسن و طبعا ميرفت نفس الشئ و مش جاية غير على الغلبانه اللي ملهاش حد يدافع عنها ، و مش مكتفية باللي بتعمليه معاها لا و كمان مقوية إبنك عليها ، هتروحي من ربنا فين بس عرفيني