الرواية ج1

ضحكت “ريم” قائلة :
-خير دي يعني اقفل ولا ايه ..

ردت “رنيم” مبتسمة :
-لا واضح انك بتفهميها وهي طايرة .. ايوة اقفلي .. عندي شغل ..

قالت “ريم” ببرود :
-بس انا معنديش شغل دلوقتي .. وبعدين شغل ايه يا حبيبتي اللي في وقت الراحة ..

ضحكت “رنيم” قائلة :
-يا بت انتي عاوزة مني ايه .. واحدة ومش عاوزة تكلمك رامية نفسك عليا ليه ..

ابتسمت “ريم” وهي تقول :
-وانا اللي قلت نيمو حبيبتي استلمت قضية جديدة امبارح ودلوقتي اعصابها مشدودة كالعادة .. دة غير قلقها على ريحانة بسبب ان دة اول يوم ليها في الشغل .. صعبتي عليا قلت اخفف عنك شوية ..

ردت “رنيم” قائلة :
-انا فعلا قلقانة على ريحانة .. بس اعصابي مش مشدود ولا حاجة .. واحنا شاكرين مجهوداتك العظيمة لتخفيف اعباء المجتمع ..

استمعت “ريم” لها وهي تعلم أنها متوترة بالفعل ولكن “رنيم” كعادتها تحب أن تخفي انفعالاتها عن كل من حولها .. لم ترد “ريم” من مكالمتها سوى التخفيف من توترها وقلقها .. حتى وإن لم تعترف “رنيم” بذلك .. ولكنها متأكدة من جدوى مكالمتها .. بالإضافة الى أن “ريم ” نفسها قلقة على “ريحانة” بشدة فهذا أول يوم لها في العمل .. ويعرفون جيدا خوف “ريحانة” من أي غريب .. فأحبت أن تشاركها مشاعرها فقط ..

أفاقت “ريم” على نداء “رنيم” لها فردت قائلة :
-معاكي اهو يا ستي .. وبعدين ريحانة دلوقتي في البريك هي كمان .. هكلمها خليكي معانا ع الخط بقى ..

ردت “رنيم” قائلة :
-حاضر .. اما اشوف اخرتها معاكي انتي وبنت خالتك ..

ضحكت “ريم” قائلة :
-اخرتها فل ان شاء الله ..

قاطعهما صوت “ريحانة” الهادئ وهي تقول :
-السلام عليكم

ردت “رنيم” وريم” في وقت واحد :
-وعليكم السلام .. عملتي ايه يا ريحانتي ..

ثم ضحكت كلتاهما تشاركهما “ريحانة” التي قالت :
-الحمد لله كان يوم كويس .. متقلقوش عليا ..

ردت “رنيم” :
-طيب .. وبعدين .. انا عاوزة تفاصيل ..

فهمت “ريحانة” ما تريد فردت :
-انا ليا مكتب لوحدي .. كل اللي هتعامل معاهم في الشغل بنات او بواسطة بنات .. حتى المدير تعاملي معاه بيكون بوجود سكرتيرته ..
ثم أكملت بحزن:
– كلهم فاكرين ان الحدود اللي انا عاملاها بيني وبين اي راجل بس .. مش فاهمين اني حتى خايفة من تعاملي مع البنات …

ساد صمت حزين بين ثلاثتهن .. قطعته “رنيم” بحزم قائلة :
-ريحانة يا حبيبتي احنا اتفقنا انك هتتعاملي مع كل الناس عادي .. اولا خوفك دة ملوش اي سبب غير خيالات في دماغك .. ومش عايزاه يأثر عليكي .. لازم تفهمي انهم هما اللي محتاجينك في الشركة دي .. ولازم تثبتي انك اد ثقتهم فيكي اتفقنا ..