شمس ج1

شمس بتأفف وبعدين يعنى.. ماهو علشان محدش بيساعدك مطلبتش منك شبكه ولا فستان خطوبه ولا فلوس كوافير ولا اى حاجه وكل ده عملته من معايا .. والشقه بتاعتك وافقت عليها رغم انها فى بيت عيله وسيبتك براحتك تجيب الحمام والمطبخ اى نوع واى جوده وقلتلك شقتك اعمل اللى انت عاوزه .. والاجهزه اللى لسه مجبتهاش بردو متدخلتش فيها ولا شرطت عليك ماركات معينه.. رغم انك بتتدخل فى كل كبيره وصغيره بابا بيجيبها ..

وانت صممت تنزل معانا ونقيت كل الاوض اللى عليا اللى عدوا ال ٤٠ الف وحجزناها قدامك وخلاص قربت استلمها وانت لسه مجبتش حتى اوضه النوم الحاجه الوحيده اللى عليك هى والاجهزه .. فها ايه المطلوب .. ماجد بنظره ذات معنى وهو يتأملها التى حاولت اخفاؤه بحقيبتها متقلقيش ده انتى هتنبهرى بالحاجات اللى هجبهالك .. كله الا اوضه النوم ههه .. دى اساس كل حاجه ولا ايه ياحبى .. شمس بخفوت حبك برص ياشيخ ماجد مكملا رغم سماعه لما قالته ماهو ياحبى على قد اللى معايا .. انا لو عليا اجيبلك نجمه من السما .. وانتى مش عاوزه تساعدينى بحاجه ..

فشلت شمس فى السيطره على اعصابها بعد تلك الكلمات فقالت بصوت عالى نسبيا كل ده ومش بساعدك لا بطلب منك هدايا ولا بتخرجنى وتجيبلى حتى كيس لب ولا بتخش علينا بكيس فاكهه ومنظرى بقى زفت قدام ماما وبابا .. ده انا ناقص اديك مهيتى ياشيخ عشان تصرف عليا منها .. ماجد ماأنا كنت عاوز اكلمك فى كده .. شمس راغبه فى لكمه بأنفه تكلمنى فى ايه عاوزنى اديك مهيتى ماجد ولازالت الضحكه السمجه تزين وجهه هههه لا ياحبى … انا بس كنت عاوز قرشين سلف كده لحد اوى الشهر …ههه بهزر بهزر ..

تراجع عن كلماته عندما لاحظ تحول لون وجهها ولكنها كبحت جماحها وزفرت بضيق فى وجهه متسائله ماجد انت عاوز ايه اتكلم دوغرى الله يخليك مليش خلق للف والدوران بتاعك ده .. ماجد بنبره خاضعه اصل بصراحه مصاريف الفرح كتيرة عليا اتسعت عينى شمس پصدمه قائله انت كمان مش عاوز تعملى فرح .. ده انا اخترت ارخص قاعه ياشيخ عاوز اكتر من كده ايه .. ماجد مدافعا لا ياحبى طبعا من حقك يتعملك احسن فرح .. بس كله على يدك وانتى عارفه الدنيا مزنقه ازاى و الفرح والفستان والكوافير كل ده كتير اوى عليا ..

شمس راغبه فى انهاء الحديث خلاص ياسيدى انا هدفع فلوس الفستان والكوافير بجملت المصاريف .. ماجد بتلقائيه طب والقاعه كورت شمس قبضتها قبل ان تسأله راغبه فى لكمه اذا اجاب على سؤالها بالايجاب قائله ماله ده كمان تحب ادفع النص ماجد مسرعا لا التلت والتلتين شمس بعدم تصديق انا مش مصدقاك .. بعد كل اللى بشيله عنك ده كمان عاوزنى ادفع تلت القاعه ماجد موضحا وهو لازال يبتسم بسماجه لا التلتين ياحبى وانا هدفع التلت ..