مستنيك 1
تأمل ملامح فتاته الساحرة وابتسامتها التي تخطف القلوب بحنان قائلاً:
_صباح الفل ياقلب عمك عزيز.. برضه هتمشى من غير ماتفطرى.
طالعت ساعتها قائلة:
_معنديش وقت عشان متأخرش علي شغلى وانت عارف المدير بتاعنا صعب قد إيه.
_ماقولتلك يابنتي انتِ مش محتاجة الشغل ده، استقيلي وكل اللي تحتاجيه أنا تحت أمرك فيه.
طالعته بحنان قائلة:
_معلش ياعمي سيبني علي راحتي، كفاية اللي انت عملته معايا من يوم وفاة ماما الله يرحمها.. أنا اتعودت علي الشغل وصعب اللي اتعود علي الشغل يقعد فاضي وبعدين دول هم ٤ أيام في الأسبوع وباقي الأيام بقضيهم معاك.
تنهد عزيز قائلاً:
_مش كفاية.. انتِ متعرفيش وجودك في حياتي غيرها ازاي، خلالها طعم ولون.. آنستي وحدتي وحليتي دنيتي يارقية.
ربتت علي يده قائلة بحب:
_انت كمان ياعمي عوضتني عن حنان الأم والأب اللي ماتوا وسابوني لوحدي.. انت كمان آنست وحدتي وحليت دنيتي ونورت الضلمة اللي كانت ماليا حياتي.
_ربنا ميحرمنيش منك.
_ولا يحرمني منك.. بقولك ايه الكلام هياخدنا وهتأخر.. سلام بقي وأشوفك بالليل.
_سلام يابنتي.. مسعود مستنيكي عشان يوصلك ومتجيش غير لما ييجي ياخدك.. اوعي يارقية تيجي لوحدك.. مفهوم؟
أدت التحية العسكرية قائلة بمرح :
_مفهوم يافندم.
ابتسم فابتسمت بدورها قبل أن تسرع بالمغادرة تتبعها عيناه الحانية وابتسامة رضا.
*******
_أنا عارفة إني مش هعرف أتكلم معاكم انتوا الاتنين.. بتتحدوا عليا؟ماشي ياسونة، مكنش العشم ياكرملتي.
_أيوة بقي اقلبيها هزار واهربي من الكلام زي عادتك.. شايفة البت وعمايلها ياكريمة؟ أنا قربت أنجلط منها.
قالت قمر بلهفة:
_بعيد الشر عنك ياماما.
أشاحت إحسان بوجهها فاقتربت قمر منها تجلس جوارها علي السرير وتحيطها بذراعها فنفضت إحسان ذراعها عنها بحنق، أعادت قمر ذراعها حولها قائلة بحنان:
_ياماما ياحبيبتي افهميني.. أنا مبفكرش في الجواز دلوقتي،لسة بدري قوي علي الكلام ده أنا لسة….
قاطعتها إحسان وهي تنهض قائلة بغضب:
_لسة إيه بس؟ اللي زيك اتجوزوا دلوقتي وبقي معاهم عيل واتنين.. انتِ مش حاسة ان العمر بيجري ولا إيه؟يابنتي أنا نفسي أفرح بيكي وأشيل عيالك علي حجري قبل ماأموت.
_بعيد الشر ياماما.. أنا….
_مامتك عندها حق ياقمر.. أي أم في الدنيا بيبقي نفسها تطمن علي ولادها قبل ماربنا ياخد أمانته وزي مامامتك نفسها تطمن عليكي أنا كمان نفسي أطمن علي ابني بدر..ربنا يهديكم ويريح قلوبكم ويطمنا عليكم ياولاد.
