مستنيك 1
تعلم مايريد الحديث عنه ومستعدة تماماً لمنحه مايرغب.. لذا هزت رأسها بهدوء وابتسمت لعزيز ابتسامة مطمئنة لملامحه القلقة قبل أن تستدير وترحل يتابعها غريب بعينيه ينحي عن نفسه تأثير تلك الإبتسامة.. يُذكر نفسه للمرة الثالثة أنه لامجال في قلبه للإعجاب بفتاة.. خاصة هي.
________
الشيطان فقط من يري الجبن والغدر والقتل في كينونته ولا يعترف به بل يصف غيره بما فيه ويحثه ليكون مثله.. والشياطين علي أشكالها تقع.
كانت تتلفت يمنة ويساراً، تنظر خلفها في ريبة قبل أن تصل لتلك السيارة القابعة علي قارعة الطريق، ومإن وصلت إليها حتي مدت رأسها من النافذة تقول لسائقتها بحنق:
_إيه ياست نفين؟ مش كنتِ تبعدي شوية.. حد يشوفنا.
_ميهمنيش.
قالتها نفين بعصبية ثم أردفت:
_اركبي ياتحية خلصيني.. أنا علي آخري ومنمتش من امبارح.
ركبت تحية السيارة تتموضع بجوارها فقالت نفين علي الفور وقد اتسعت عيناها غضباً وظهر الشر علي ملامحها:
_هو أنا مش قايلالك أي حاجة تحصل في البيت ده تيجي تقوليلي عليها.
هزت تحية رأسها وقد ارتعش جسدها من نبرات نفين المتوعدة وزادت ارتعاشتها حين أردفت الأخيرة بغيظ غاضب:
_طب ليه مقولتليش علي كارثة امبارح؟هي دي حاجة تخبيها عليا؟
أسرعت تحية تقول:
_مخبيتهاش ياستي.. والله ماخبيتها.. هو الموضوع بس جه بسرعة، فجأة لقيت الست نعمات بتقولي نضفي البيت بسرعة ياتحية، نضفته..ويادوبك لسة بقعد عشان أرتاح لقيت المأذون جاي وبيكتبوا الكتاب.. والله كنت هتصل بيكي بس مكنش معايا رصيد ومكنش فيه فرصة أخرج عشان أشحن والموضوع جه بسرعة زي ماقولتلك واتلبخت.
قطبت نفين جبينها قائلة:
_وازاي سيدك غريب اتجوز البت دي؟
_معرفش وحياتك.. أنا اتفاجأت زيك تمام، بس الموضوع مش نازلي من زور.. حاسة ان فيه حاجة غلط، الفرح زي ماشوفتيه.. زي مايكون ميتم ومفيش حد فيه فرحان، يكونش البيه غلط معاها وبيصلح غلطته.
_غلط معاها ايه ياحيوانة انتِ؟هي دي أشكال يبص ليها سيدك؟
_ميبصلهاش ليه بس دي زي القمر و….
غصت كلماتها بحلقها مع نظرة نفين الزاجرة لها فأسرعت تردف:
_بس علي رأيك.. ازاي غريب بيه هيبصلها وهي جاية من الشارع لا ليها أصل ولا فصل.
أشاحت نفين بوجهها تتطلع إلي المنزل القريب إلي حد ما، تنقر بأصابعها المطلية علي مقود السيارة قبل أن تزفر بقوة وتلتفت إلي تحية تقول لها:
_انزلي دلوقت وارجعي البيت وفتحي عنيكي كويس، وأي حاجة تحصل.. أي حاجة ياتحية تحكيهالي فوراً من غير أي تأخير.. مفهوم؟
