رائعة ج ٣
زفـــــر يزيد في انزعاج جلي ، فاستغرب آدم أكثر من تصرفاته المنفعلة و…
-آدم متابعاً بنبرة هادئة : تلاقيها هنا ولا هنا ، ماهي مش معقول هاتفضل أعدة في حتة واحدة يعني ، دي صحفية وآآ..
أشــــاح يزيد بيده في وجه آدم ، و…
-يزيد مقاطعاً بنبرة متعصبة ، ونظرات حانقة : مش مبرر إنها تختفي كده ، وتعمل اللي على مزاجها من غير ما ترجعلي
-آدم بنبرة مندهشة ، ونظرات مذهولة : وهي هترجعلك ليه ؟ ماهي بتشوف شغلها اللي المفروض هي جاية عشانه
-يزيد بنبرة غاضبة وهو يشير بيده : برضوه هاتقولي شغلها ..!!!!
-آدم بنبرة متريثة ، ونظرات فاحصة : ايوه ، هي معملتش حاجة غلط
-يزيد بنبرة متشنجة ، ومتوعدة : بس أنا محذرها إنها متعملش حاجة إلا لما ترجعلي ، وهي برضوه مصممة تركب دماغها ، إن ما عرفتها قيمتها
-آدم بهدوء حـــذر : مافيش داعي إنك تتسرع في الحكم عليها ، استنى أما نشوف ظروفها ايه
-يزيد بنبرة استنكار وتهكم : هي كانت مهاجرة ولا حاجة ، ده هي في حتة مكان أد كده
-آدم بنبرة هادئة : معلش ، الوقتي تبان ، وبرضوه بأرجع أفكرك إنها صحفية ودي طبيعة شغلها
-يزيد بغضب هـــادر : الله يحرق ده شغل ، كل ما هاقولك حاجة تقولي شغلها شغلها ، خلاص عينتك المحامي بتاعها عشان تدافع عنها !!!
اتسعت مقلتي آدم في استغراب شديد نتيجة غضب يزيد الغير مبرر ، وحاول ألا ينفعل هو الأخـــر ، ويتحكم في أعصابه أكثر ، فأخذ نفساً عميقاً ، وزفره على تمهل و…
-آدم بنبرة دبلوماسية ، ونظرات ثابتة : لأ مش المحامي بتاعها ، بس هي بنت مختلفة عن أي حد ، وبتحاول على أد ما تقدر تعمل اللي انت بتطلبه منها
-يزيد بنبرة ساخطة : واضح أوي انها بتسمع الكلام
-آدم وهو يبتلع ريقه في توتر : اهدى بس انت ، وأما تظهر هـ .. آآآ…
-يزيد مقاطعاً بنبرة صارمة : خلاص يا آدم ، انتهى الموضوع
ثم كور يزيد قبضة يده ، وطرق بها بقوة على الحافة المعدنية ، و…
-يزيد بنبرة متوعدة ، ونظرات قاسية : طيب يا فرح ، بس تظهري أودامي ، وأنا هوريكي
انصرف يزيد من أمـــام آدم ، وهو يتمتم بكلمات مبهمة ، في حين ظل آدم مسلطاً بصره عليه في اندهــاش عجيب من تصرفاته الغير مفهومة بالمرة ، ثم تذكر أنه ربما يكون للأمــــر علاقة بزوجة يزيد السابقة هايدي ، وشغفها بالعمل ، فربط بين انفعاله الزائد على فرح ، وعقدته من قضية عمل المرأة بصفة عامة ..
-آدم بتوجس : ربنا يستر ، ويعدي الموضوع ده على خير
