رائعة ج ٥

اضطربت فرح كثيراً بسبب قربه الشديد منه ، وحاولت لأكثر من مرة أنا تبتلع ريقها ، ولكنها كانت خائفة للغاية منه ، ثم …
-فرح بنبرة مرتبكة : آآ.. ما.. ماشي
-يزيد بنبرة أقرب للهمس وهو ينظر مباشرة في عينيها : ماشي ايه ؟
-فرح بنبرة متلعثمة : أنا .. أنا معاك

اعتلت شفتيه ابتسامة مغترة ، ثم أمسك بكفي يدها ، وقام بحل وثاقهما ثم ابتعد عنها ، واتجه ناحية الباب ، بينما فركت هي رسغيها في آلم ، ثم نهضت عن المقعد لتلحق به ، ولكنها تسمرت في مكانها حينما رأت أنها متواجدة بوحدتها العسكرية في الإسكندرية ، وليس كما أخبرها هو من قبل .. فتملكها الغيظ ، ثم دققت النظر أمامها لتجد آدم واقفاً إلى جواره و..
-آدم مبتسماً بثقة : مش أنا قولتلك هتوافق ، عشان تصدقني ، ده تخطيط على مستوى عسكري دولي
-يزيد بهدوء : تمام

لمحها آدم وهي تنظر إليه ، فابتسم لها ببلاهة ، ثم لوح لها بيده و..
-آدم بابتسامة مستفزة : منورة الوحدة يا فرح
-فرح بحنق : يعني انتو كنتوا بتشتغلوني ؟

استدار يزيد بجسده للخلف ، ووقف قبالتها ، ثم رمقها بنظرات جادة و..
-يزيد بنبرة رسمية ، ونظرات متوعدة : أنا مش بهزر في الشغل ، وانتي فعلاً طالعلك قرار بإنك هاتكوني المراسلة العسكرية للوحدة ، ولو منفذتيش القرار هيبقى في تصرف تاني …!

وزعت هي نظرها بينه وبين آدم ، وابتلعت ريقها مجدداً في توتر و..
-فرح بنبرة متلعثمة : بس آآ.. بس أنا آآ..
-آدم بهدوء : نصيحة من أخ أكبر منك بلاش ترفضي ، انتي مش عارفة المقدم يزيد

ثم تركها الاثنين تتخبط في قرارها ، وانصرفا بعيداً عنها ، بينما وقفت هي تنظر أمامها في حيرة ، ثم وضعت كلتا يديها على شعرها و…
-فرح وهي تزفر في انزعاج : اوووف .. طب هاعمل ايه الوقتي ؟ يعني أقبل ولا أرفض ولا أعمل ايه بالظبط ؟؟!

……………………….

في منزل آدم الجزار ،،،،

اتصل آدم هاتفياً بزوجته شيماء ليبلغها بأن تستعد للسفر إلى الاسكندرية بعد يومين من أجل حفل نادي اليخت والمقام حصيصاً للضباط وأسرهم ، فسعدت شيماء كثيراً بهذا و…
-شيماء هاتفياً بنبرة متلهفة : الله ! ده أنا هاجهز الشنط من دلوقتي عشان تيجي تاخدنا على طول
-آدم هاتفياً بنبرة مازحة : يا ستي أنا بقولك لسه كمان يومين ، مش دلوقتي
-شيماء بحماس اكبر : برضوه ، أكون لحقت جهزت الحاجة ، وشوفت اللي ناقصني
-آدم بنبرة متوجسة : ربنا يستر وملاقيكيش جايبة البيت كله معاكي
-شيماء بنبرة مغتاظة : على فكرة أنا مش باجيب غير الضروري بس
-آدم بنبرة ساخرة : والضروري بتاعك مش هايكفيه عربية نقل بالمقطورة بتاعتها
-شيماء بنبرة ضائقة : بطل بقى ، مش كله عشان خاطر بنتك ولبسها وغيارتها ، هو أنا باخد حاجة ليا
-آدم بتهكم : يا شيخة ، أما نشوف …!