رائعة ج ٥

ثم ســــار يزيد عدة خطوات للأمـــام ليسبقهما ، بينما التفتت فرح برأسها ناحية آدم و…
-فرح متسائلة باستغراب : هو ماله ؟
-آدم بنبرة عادية : ده العادي بتاعه .. تعالي عشان نلحق نجيب اللي ناقصنا ، وخلي بالك احنا معانا ساعتين كحد أقصى ، يعني لازم نخلص كل حاجة قبل كده
-فرح وهي توميء برأسها ، وبنبرة هادئة : ربنا يسهل

ثم دلف ثلاثتهم بعد ذلك إلى خــــارج الوحدة التدريبية حيث توجهوا إلى بعض المحـــال القريبة من أجل شراء بعض الأشياء المطلوبة من أجل تقديمها كهدايا رمزية لبعض الضباط خلال الحفل ..

توقفت فرح أمام واجهة أحد المحـــال الخاصة ببيع الملابس الحريمي ، وقررت أن تدلف إلى داخله ، اعترض يزيد على ما فعلته ، وكاد أن يشتبك معها ، ولكن أوقفه آدم بـ…
-آدم بنبرة جادة : يا يزيد سيبها تجيب اللي هي عاوزاه
-يزيد بحنق ، ونظرات مشتعلة : هو احنا فاضيين للهري بتاع الستات ده ، ده احنا ناقصنا حاجات أد كده ، ودي داخلة تتفرج على هدوم
-آدم بنبرة هادئة ، ونظرات ثابتة : تلاقي بس حاجة محتاجاه ضروري وآآ…
-يزيد مقاطعاً بغيظ : واحنا هنفضل واقفين لها كده زي عساكر الدرك
-آدم مازحاً : لأ احنا مقدمين الدرك .. اعلى شوية بالرتبة يا باشا

لكــــز يزيد آدم بحدة في جانبه ، ثم وقف يزفر في ضيق …
مرت عدة دقائق ثم دلفت فرح إلى خـــارج المحل وعلى وجهها ابتسامة مشرقة ، ولكنها سريعاً ما انطفت حينما رأت وجه يزيد العابس ، فعضت على شفتها السفلى ، ثم أطرقت رأسها للأسفل ، ومدت يدها لتعبث بخصلتها و…
-فرح وهي تتنحنح في خجل : احم .. سوري ان كنت أخرتكم
-آدم مبتسماً في هدوء : لأ عـــادي .. خدي راحتك

رمقه يزيد بنظرات غاضبة ، ثم أشار لكليهما بيده و…
-يزيد بنبرة مغتاظة : يالا بقى ، لأحسن أنا جبت أخري خلاص

ســـــار يزيد للأمـــام بخطوات سريعة ، فركضت فرح خلفه ، وســـار إلى جوارها آدم و…
-آدم مازحاً : نصيحة مستقبلية ماتبقيش تاخديه معاكي في مشاوير ، هايطلع عينك ومش هتجيبي حاجة ، ده مش بعيد يخلي البايعين يفلسوا
-فرح بنبرة ضائقة : انت غلبت تنصحني كتير بسببه
-آدم مبتسماً في لؤم : بأمنلك مستقبلك يا شابة ..

ثم التفت إليهما يزيد ورمقهما بنظرات محذرة و…
-يزيد بحدة : انتو هترغوا مع بعض وتنسوا احنا جايين ليه ، يالا ..
-فرح بتبرم : طيب
-آدم بجدية زائفة : علم يا باشا ..