رائعة ج ١

………………….

تعالت بعض الهمهمات من سيدتين جالستين على مقربة من فوزية ، في البداية لم تكترث لحديثهما ، ولكنها تنبهت فجــــأة ، واضطربت ملامحها ، واتسعيت عينيها حينما همست إحداهما بـ….
-سيدة ما متسائلة بفضول : طب وهما عرفوا إزاي انه مات ؟؟؟
-إحدى السيدات بخفوت : مراته هي اللي بلغتهم بم*وته …………………………………………….. !!!!!!!!!

……………………………………………….

فراشة أعلى الفرقاطة

الحلقة الرابعة :

في منزل عائلة كريم بركات ،،،،

اتسعت عيني السيدة فوزية في ذهول تام حينما استمعت دون قصد منها للحديث الجانبي الذي دار بين سيدتين جالستين إلى جوارها و…
-سيدة ما متسائلة بفضول أكثر : هو كان متجوز ؟
-إحدى السيدات بخفوت : يووه ، ده من زمان ، يجي من سنتين وزيادة
-سيدة ما باستغراب : من سنتين ، بس اللي اعرفه إنه كان كاتب كتابه باين وآآآ….
-إحدى السيدات مقاطعة بنبرة خافتة ومتهكمة : أيوه ، دي مراته التانية ، بت كده معرفش أبصر ايه ..
-سيدة ما متسائلة وهي تزم شفتيها : يعني هو على كده متجوز اتنين ؟؟؟
-إحدى السيدات متابعة بجدية : اه ، ماهو قادر بقى ، أصل الحكاية إنه أول ما سافر السعودية اتعرف على واحدة قادرة ومتريشة ( غنية ) ، اتعلقت بيه ، وهو الظاهر حبها ، واتجوزها ، وبقت بتصرف عليه ، وساعدته كتير ، بس حسرة عليه ملحقش يفرح بعياله ..!
-سيدة ما بنظرات متعجبة ، ونبرة هامسة : هو مخلف ؟
-إحدى السيدات وهي تمط شفتيها في أسف : يا حبة عيني عنده واد صغير مكملش سنة ، والتاني جاي في السكة ..!!!!!!
-سيدة ما بنظرات فضولية ، ونبرة خافتة : طب والست سميرة كانت عارفة ده ؟
-إحدى السيدات وهي توميء برأسها بثقة : اه كانت عارفة ، اومــال انتي مفكرة إنه زي ولادنا المقاطيع بيعملوا اللي في دماغهم من غير مايخدوا رأي كبيرهم ، لأ ده سأل أمه ، وهي وافقت على طول ، بيني وبينك دي ماصدقت ، الولية اللي كانت متجوزاه معاها أد كده …!
-سيدة ما بنبرة شبه مغتاظة : أه طبعاً ، كان لازم توافق ، حد يلاقي الأملة دي ويقولها لأ ..
-إحدى السيدات بنبرة شبه ساخرة : يعني هو خد حاجة معاه ..!!!!!!

توالت الصدمات على السيدة فوزية ، وشعرت أنها تتخيل ما تسمعه ، وأنها مجرد أوهـــام ، ولكن لكي تقطع الشك باليقين ، نهضت من مكانها ، وتوجهت إلى تلك السيدة التي تسرد بثقة تامة أموراً عائلية يترتب عليها مستقبل وحياة ابنتها …