رائعة ج ١
أطرقت فرح رأسها في خجل ، وتوردت وجنتيها قليلاً و…
-فرح بنبرة خجلة : تسلميلي يا طنط
-بركات بصوت آجش : الواد كريم عرف ولا لسه ؟
-كاميليا بنبرة جــادة : اكيد يا بابا ، هي فرح تقدر تخبي حاجة على كيمو حبيب القلب
-سميرة بنبرة دافئة : الله ! مش جوزها يا بت
عقدت كاميليا حاجبيها في ضيق زائف و…
-كاميليا وهي تلوي شفتيها : يووه يا ماما ، أنا مش بحب كلمة بت دي ! أنا في سنة أولى اقتصاد ، يعني كلها كام سنة وأبقى سفيرة
-سميرة باستخفاف : برضوه هاتفضلي بت في نظري
جلس الجميع يتبادلون أطراف الحديث المرح والجاد .. وتطرقوا إلى الكثير من المواضيع أثناء تناولهم للغذاء ..
قررت فرح أن تُفاجيء كريم ، وتتصل به عن طريق برنامج المكالمات بالفيديو ( سكايب ) لكي يتحدث مع عائلته ، وبالفعل أجرت الاتصـــال ، وكانت مكالمة مثمرة للغاية ، حيث اتفق مع كلا العائلتين على جعل موعد الزفاف بعد شهرين ، فتعالت الزغاريد في أرجــاء المطعم ، واحتضنت السيدة فوزية ابنتها ، في حين قبلت السيدة سميرة زوجة ابنها المستقبلية ، بينما ربت الأستاذ بركات على ظهر كِنته برفق ..
……………………………….
في مقر جريدة الضحى ،،،،
توجه السيد أمجد البسيوني – مدير قسم التحقيقات بالجريدة – إلى مكتب مدير إدارة الجريدة ، ورئيس التحرير الأستاذ عبد السلام لمقابلته في أمــر عاجل ..
كان السيد أمجد ذو ملامح جادة ، ووجه عبوس رغم قلبه الطيب .. ولكن حبه لعمله ، وخاصة أن القسم الذي يتولاه يتناول موضوعات حساسة جعلته دائماً يبدو جاد الملامح مكفهر الوجــه إلا في مناسبات نادرة ..
سمحت السكرتيرة للسيد أمجد بالدخول إلى مكتب رئيس التحرير الذي نهض عن مقعده فور رؤيته إياه و…
-عبد السلام بنبرة هادئة وهو يشير بيده : اتفضل يا استاذ أمجد
-أمجد بنبرة جدية : شكراً يا أستاذ عبد السلام
-عبد السلام بصوت رزين : خير ، حضرتك كنت عاوزني في ايه ؟
-أمجد بنظرات ثابتة ، ونبرة أقل جدية : اطمن يا أستاذ عبد السلام ، دي حاجة عادية
-عبد السلام وهو يمط شفتيه : ممممم .. بس وشك بيقول غير كده !
-أمجد بنظرات حــادة ، ونبرة شبه رسمية : انت عارفني يا استاذ عبد السلام ، في الشغل ببقى زي الألف ، مش بعرف أفرد وشي ولا آآآ…
-عبد السلام مقاطعاً بصوت رخي : عــارف ، عارف ..!
-أمجد بنبرة متريثة : أنا كنت عاوز أقترح على حضرتك حاجة ، أنا عارف إنه لسه بدري على ما يجي وقتها بس إنت عارفني يا أستاذ عبد السلام ، بحب أرتب كل حاجة لمدة شهرين قدام
-عبد السلام وهو يهز رأسه : مفهوم طبعاً
-أمجد بهدوء زائف : أنا بقترح إننا نخلي قسم التحقيقات ينزل إنفرادات عن أهم إنجازات القوات المسلحة بكافة فروعها على مدار سلسلة تحقيقات متتالية
