رائعة ج ١

احتقن وجـــه شيماء من الغيظ ، وضاقت عينيها فجأة ، وامتعض وجهها ، ورمقت آدم بنظرات متوعدة ..

ثم فجــــأة وجد آدم لعبة مـــا تخص طفلته الصغيرة تُلقى في إتجاهه بسرعة الصاروخ ، فإنحنى بجذعه للأسفل لكي يتفاداها و…
-آدم بنبرة فرحة ، ونظرات سعيدة : الحمدلله مجتش فيا

لم يتمكن آدم من تفادي اللعبة الأخرى التي إلقيت في وجهه بنفس القوة والسرعة ، فتأوه من الآلم بعد أن ارتطمت بعينه اليسرى و…
-آدم متآلماً وهو يمزح : آآآآآه … ويوم ما تنشن ، لازم تصيب .. آآي ..

……………………………..

في مقر جريدة الضحى ،،،،،

طلب الأستاذ عبد السلام البدوي لقاء الأستاذ أمجد بعد أن فكر ملياً في فكرته المقترحة والتي عرضها عليه قبل يومين ..

توجه الأستاذ أمجد إلى مكتب مدير التحرير وقلبه متوجس خيفة من أن يرفض اقتراحه ، ولكنه تفاجيء بـ ….
-عبد السلام بنبرة هادئة رزينة : أنا موافق على فكرتك يا أستاذ أمجد

تهللت أسارير الأستاذ أمجد ، وانفرجت ملامحه ، وظهرت ابتسامة عريضة من بين أسنانه و…
-أمجد بنظرات فرحة ، ونبرة حماسية : أنا مش عارف أشكرك ازاي يا أستاذ عبد السلام ، إنت مش متخيل آآآ…
-عبد السلام مقاطعاً بجدية : بس عندي شرط

تبدلت ملامح أمجد للجدية سريعاً ، ثم حدق في عيني الأستاذ عبد السلام بنظرات حائرة ومتوترة و..
-أمجد بتوجس : شرط ايه ؟
-عبد السلام بنبرة متمهلة : إنك تراعي دور الشهداء في الحرب ، بس الشهداء اللي مش معروفين
-أمجد فاغراً شفتيه : هــه
-عبد السلام متابعاً بنفس الثبات الانفعالي : يعني زي ما هنتكلم عن الجديد ، لازم نراعي دور القديم ، ومتقلقش أنا هتكلم مع مسئولي إدارة الشئون المعنوية للقوات المسلحة ، ونشوف التصاريح اللازمة والمطلوب بحيث نمشي قانوني
-أمجد وهو يهز رأسه بجدية : مافيش مشكلة يا أستاذ عبد السلام ، وأنا هابدأ أجهز فريق العمل معايا
-عبد السلام وهو يمط شفتيه وبنبرة تشجيع : عظيم أوي ، وأنا مستني قايمة الأسماء عشان التصاريح ، انت عارف الحاجات دي بتاخد وقت
-أمجد بنبرة حماسية : أنا هاشتغل على القايمة ، وكده كده معظم اللي هاينضموا للفريق معايا من الشباب ، وهاقسمهم بحيث يغطوا كل الأفرع
-عبد السلام بنبرة محذرة : لو هتضم لفريقك بنات خليهم يقوموا بالعمل الكتابي ، والتنسيقات ، انت عارف إن آآآ…
-أمجد مقاطعاً بجدية : مفهوم يا أستاذ عبد السلام ، عشان نتجنب الحرج ، وكمان المواضيع دي عاوزة تفرغ ومجهود كبير ، ومش هاينفع ان اي بنت تسيب بيتها وتقعد بالأيام متفرغة للتحقيق ده
-عبد السلام بحزم : بالظبط .. احنا برضوه لازم نراعي بناتنا ..
-أمجد بنبرة حماسية ، ونظرات متفائلة : وأنا متوقع إننا هانعمل شغل عالي إن شاء الله
-عبد السلام بهدوء : يا مسهل