رائعة ج ١
استدار يزيد بجسده بعيداً عن هايدي محاولاً السيطرة أكثر على عصبيته ، و…
-يزيد وهو يجز على أسنانه في انفعال : الله يحرق ده شغل ، مش جايلي منه غير وجع القلب
عقدت هايدي ساعديها أمام صدرها ، وأشاحت بوجهها الغاضب في الناحية الأخرى و…
-هايدي بحنق : شغلي اللي مش عاجبك ده هو اللي عاملي قيمة وسط الناس ، ومخليك رافع راسك وسطهم ، وبتقول الدكتورة هايدي دي تبقى مراتي ، ولا انت كنت عاوزني أعد أخبز ، وأحلب الجاموسة عشان أعجب .. ماهو ده اللي كان ناقص
-يزيد بزمجرة عالية : أنا طهقت من دي عيشة ..!!
-هايدي بتهكم واضح : ظهقت عشان الكلام مش جاي على هواك ، إنت عاوزلك واحدة تكون زي الأرنبة تخلف وبس
أثارت كلمات هايدي إنفعال يزيد أكثر ، فالتفت ناحيتها ، ورمقها بنظرات نارية و…
-يزيد بنبرة صادحة : هو أنا كفرت عشان عاوز أكون أب … حرام عليكي يا شيخة حسي بيا !
-هايدي ببرود مستفز : وأنا قولتلك أنا مش هاضحي بشغلي ولا بطموحي عشان شوية عيال
-يزيد بغضب جم ، ونظرات استهزاء : ظلمك اللي خلاكي دكتورة نسا …!!!!!
………………………………………….
عــــاد يزيد من شروده على إثر الجدال الدائر بين آدم وزوجته شيماء ، فنهض عن الأريكة المذهبة و…
-يزيد بحزم ، ونظرات فارغة : عند اذنكم ، وشكراً مرة تانية على العزومة دي
-آدم باستغراب شديد : في ايه يا يزيد ، انت لحقت ، ما تستنى شوية
-يزيد بجدية ، ووجه جامد ، وخالي من التعبيرات : لأ معلش ، أسيبكم ترتاحوا ، وألحق أنا كمان أروح عشان أجهز نفسي للسفر ، انت ناسي ، احنا راجعين بكرة الوحدة بتاعتنا ..!
-آدم بإحراج : ماشي يا زيزوو ، اللي يريحك
-يزيد وهو يتمتم بإقتضاب : سلامو عليكم ..
ســـار يزيد بخطوات سريعة ناحية باب المنزل ، ثم دلف للخـــارج وأغلق الباب من خلفه ، في حين عاتب آدم زوجته على ما فعلت ونهرها بشدة و…
-آدم بحنق : ينفع كده ، أهوو الجدع خد في وشه وطـــار
-شيماء بعدم اكتراث ، وببرود : والله أنا عاوزة مصلحته ، ماهو مش هايفضل طول عمره كده
-آدم بعصبية نسبية : هو مبسوط كده ، إنتي مالك
-شيماء بجدية ، ونظرات حـــادة : لأ مالي ونص ، لما ألاقي بنت حلوة وجميلة وزي الفل ، وألف مين يتمناها تضيع كده من غير ما ألحق أحجزها أبقى هبلة
-آدم بنبرة ساخرة : يكونوش عينوكي خاطبة وأنا معرفش ..!!!!
-شيماء بنبرة عنيدة : أه ، طالما بسعى في الحلال ، يبقى ليه لأ
-آدم مازحاً ، وهو يغمز : وأنا ميرضنيش أضيع عليكي الفرصة ، إنتي جوزهالي في الحلال ، وأهو تبقي كسبتي فيها وفيا ثواب
