رائعة ج ٢

ســــارت فرح في اتجاه غرفة نومها ، ثم أغلقت الباب خلفها حينما دلفت للغرفة ..
عاودت فرح الاتصـــال بإيلين وهي تجلس على طرف فراشها و…
-فرح هاتفياً بنبرة فاترة ، وهي مجفلة لعينيها : هاي إيلي
-إيلين هاتفياً بنبرة متلهفة : ازيك يا فرح ، عاملة ايه يا حبيبتي ؟
-فرح بنبرة هادئة : عادي .. ماشي الحال
-إيلين بنبرة حماسية : طب أنا عندي ليكي أخبار هتبسطك أوي

عقدت فرح حاجبيها في استغراب ، وتنبهت حواسها و…
-فرح بنبرة مهتمة ، ونظرات ثابتة : أخبار ايه ؟
-إيلين بنبرة متفائلة ، ونظرات مشرقة : بصي يا ستي ، وصلتني اخبار من مصادري الخاصة إن الاستاذ أمجد هيخليكي تبقي مكانه في تحقيقه اللي جاي

هزت فرح رأسها في عدم فهم ، واعتدلت أكثر في جلستها على الفراش و..
-فرح بنبرة متسائلة : يعني ايه ؟؟ أنا مش فاهمة

سردت إيلين بإختصار شديد ما نمى إلى مسامعها من وجود معلومات مؤكدة تفيد بقرب توليها مهمة التحقيق الصحفي المتعلق بإنجازات القوات البحرية وتطورها ، وذلك ضمن سلسلة التحقيقات الخاصة بمناسبة أعياد سيناء ..

أخذت فرح نفساً عميقاً ، وزفرته بتمهل ، ثم نهضت عن فراشها ، وسارت عدة خطوات للأمام في اتجاه مكتبها الصغير الموجود في أحد أركان الغرفة وهي تضع يدها على شعرها وتعبث بخصلاته و..
-فرح بهدوء حذر : بيتهيألي أنا .. مش هوافق
-إيلين بخضة ، ونظرات مصدومة : ليه بس يا فرح ، صدقيني دي أنسب حاجة تقدري تخرجي بيها من جو الاكتئاب اللي انتي عايشة فيه ده ، البحر والهوا والـ… آآآ
-فرح مقاطعة بجدية : بحر وهوا ، وكلام فارغ ايه بس ، أنا أصلا مش غاوية البحر ولا بحبه ، أقوم أروح أعمل تحقيق صحفي مرتبط بيه

عضت إيلين على شفتيها من الغيظ ، ثم أردفت بـ….
-إيلين متابعة بنبرة مُصرة ، ونظرات متعشمة : يا بنتي ده موضوع مهم ، هينقلك في مكانة تانية خالص ، وبعدين بصراحة أنا مش عاوزة حد تاني ياخده غيرك ، انتي عارفة أد ايه الكل طمعان يبقى مكانك
-فرح بعدم اكتراث : إيلي ، بليز أنا فيا اللي مكفيني ، عاوزة أطمن على نتايج التحاليل بتاعتي ، وعاوزة أركز في حياتي دي ، وأنا مش حمل أشيل مسئولية مكونش أدها ..
-إيلين بنبرة متحمسة : اطمني يا فروووح ، النتيجة هتبان بالليل ، وأنا متفائلة خير ، بس عشان خاطري يا فرووح أوعي تضيعي الفرصة دي من ايدك ، اوعي تقولي لأ .. وحياة مارسيل عندك …!!!