رائعة ج ٢

لم تعقب فرح على عبارات آدم ، بينما استمر هو في ..
-آدم متابعاً بنفس الهدوء : المهم أنا كنت جاي أعتذرلك عن اللي حصل ، هو يزيد مايقصدش ، اه أنا عارف إنه حنبلي شوية ، بس والله قلبه طيب ، ويتحط على الجرح يطيب

استدارت فرح بوجهها ناحية آدم ، ورمقته بنظرات استنكار ، فتنحنح وهو ينظر إليها بجدية و…
-آدم بنبرة مازحة : بصي هو الجرح مش هايطيب أوي ، يعني هايفأفأ الأول ، ويعبي مياه ، ويقلب بتسلخات ، ويبقى عاوز كيناكومب ( مرهم ملطف ) ، وبعد كده يطيب …!!

ظهر شبح ابتسامة على وجــه فرح ، وحاولت هي أن تضع أصابع يدها على شفتيها لتمنعهما من الانفراج والضحك ..

ظل آدم يلقي بعض الدعابات المازحة على فرح حتى بدأت ابتسامتها في الظهور جلية و..
-آدم بنبرة متعشمة : وربنا إنتي عاوزة تضحكي ، أيوه أنا شايف الضحكة أهي ..
-فرح بنبرة ممتعضة : أنا مش عارفة هو مطلعش زيك ليه كده
-آدم مبتسماً وبنبرة مألوفة : والله هو كويس جداً ، بس الزمن اللي جار عليه
-فرح بتهكم : طب وأنا ذنبي ايه ؟
-آدم بنبرة جادة : معلش ، حظك الفل وقعك معاه ، بس عاوزة تكسبيه ابعدي عن أي حاجة تضايقه ، وصدقيني هاتبقي فرخة بكشك عنده

لوت فرح فمها في استخفاف ، ثم حدقت في آدم و….
-فرح على مضض ، وبنظرات استهجان : المطلوب مني ايه عشان أنول شرف رضاه السامي

أوضح آدم لفرح المحظورات التي يجب عليها تجنبها لكي لا تتعرض للتوبيخات اللاذعة مجدداً منه ، والتي كانت تتضمن عدم الصراخ عالياً ، عدم الوقوف بوجهه بتحدي .. عدم النظر إليه بتعالي .. عدم الحديث عن الشغف بالعمل أو حتى الإشارة من قريب أو بعيد عنه .. أخذ رأيه في كافة الأمور حتى التوافه منها .. عدم إغفال تعليماته مهما كانت صغيرة .. إعطائه قدره .. وأهم نقطة هي تجنب العناد معه تحت أي ظرف ..

فغرت فرح شفتيها في صدمة وهي تسمع إلى المزيد والمزيد من التعليمات الجادة بشأن تجنب غضب يزيد ..
-آدم وهو يتنهد بإرهاق : هـــــاه .. بس خلاص
-فرح بتهكم واضح ، وبنظرات ساخطة : بس كده ..!!
-آدم وهو يوميء برأسه في ترقب : اه .. وأنا حاسس إن شاء الله ولا حاجة من اللي أنا قولتلها هتتعمل

ضيقت فرح نظراتها ، ثم جزت على أسنانها و…
-فرح بتوعد : اطمن .. ده أنا هاخليه يتشرف بيا
-آدم بتوجس : استر يا رب ..