رائعة ج ٢
صمتت فرح قليلاً لتبتلع ريقها في مرارة خاصة بعد أن تذكرت ما حدث في منزل عائلة كريم و…
-فرح بنبرة مريرة : يا إيلي إنتي بنفسك شوفتي مامت كريم بهدلتني ازاي وحملتني ذنب موته رغم إنها عارفة كويس إن ده قضاء ربنا ، دي بدل ما تطبطب عليا وتواسيني وخصوصاً بعد ما عرفت الحقيقة ، لأ شتمتني وطردتني .. !!
-إيلين بنبرة آسفة : معلش يا فرووح ، بكرة أحسن
-فرح بتهكم : بمناسبة بكرة ، أنا عاوزة اقولك إن اللي اسمه المقدم يزيد ده ناوي يطلع عيني ، وشكله ناويلي على نية فلة
-إيلين متسائلة وهي تعقد حاجبيها باستغراب ، وبنبرة فضولية : مين المقدم يزيد ده كمان ؟
-فرح بإقتضاب وخفوت : ده رئيسي في الوحدة
-إيلين بنبرة مهتمة ، ونظرات مشرقة : لأ أنا عاوزة أعرف كل حاجة بالتفصيل ، مش تكروتيني كده …
ظلت فرح تثرثر مع إيلين حول صدامها مع يزيد ، وتسرد لها ما فعله ويفعله معها منذ أول لحظة لقاء بينهما ..
تنهدت إيلين بحرارة وهي تصغي لما تقوله فرح و…
-إيلين غامزة ، وبنبرة خبيثة : واضح كده إنك هاتطلعي بحاجة من الموضوع ده
-فرح بنبرة منزعجة وجـــادة : إيلين أنا مش بحب كده
-إيلين بهدوء حذر : خلاص يا فرووح ، أنا مقصدش ، ده أنا بهزر معاكي
-فرح بنبرة حازمة : انتي عارفة كويس يا إيلين إن أنا مش كده
-إيلين بتوجس : أووف ، طالما بتقوليلي إيلين يبقى انتي زعلانة مني بجد .. سوري يا فروووح أنا مقصدش يا حبي ، بليز سامحيني
زفـــرت فرح في انزعاج ، و..
-فرح بنبرة ضائقة : ربنا يسهل ، أنا هاقفل بقى عشان عاوزة أنام
-إيلين بنبرة راجية : لالالا ، مش قبل ما تقوليلي إنك سامحتيني
-فرح بإقتضاب : باي يا إيلين ….!
أنهت فرح المكالمة مع إيلين ، ثم ألقت بهاتفها على الفراش دون إكتراث ، وظلت تزفر لأكثر من مرة بضيق ، فتلميحات إيلين أثارت انزعاجها ، وهي تخشى أن تتحول تلك التلميحات والشكوك لأمــر واقعي ، لذا عقدت فرح العزم على أن تكون جادة في تصرفاتها حتى لا تترك المجـــال ليزيد أو لغيره لكي يقتحم حياتها ..
نهضت فرح عن الفراش ، ثم سحبت المقعد البلاستيكي الموضوع أمام الطاولة الصغيرة ، وجلست عليه ، ومدت يدها في اتجاه حاسوبها المحمول لتفتحه ، وتبدأ العمل الكتابي عليه ، فهي تبحث عما يشغل بالها عن التفكير فيما أثارته إيلين بتلميحاتها ..
