جديدة جدا 1
– السلام عليكم
فاه بتحيته بعدما حمحم محرجًا ليواجهه إعصار كما شعر به وهي تتحدث بلوم وعتاب:
– أنتَ ليه بتعاملني كدا.. ليه بتأذيني؟!
عقد حاجبيه وتجهم وجهه من فرط الاندهاش ليسألها بقلق:
– أنا؟! أنا عملت إيه؟
لتتابع بصوت مرتفع لم يعجبه:
– أنت مبتعملش أصلًا.. مشكلتك إنك مبتعملش يا أواب.
اعتراه الضيق من عدم احترامها له في الحديث ليسأل ببرود:
– من ناحية؟
ازداد انفعالها من بروده، وارتفع صوتها أكثر وهي تلومه بغضب وصل إليه:
– أنت اتصلت بيا كام مرة من وقت ما اتخطبنا قول لي؟! سألت عليا كام مرة؟ قلت لي بحبك كام مرة؟ عمرك بعت لي إني وحشتك؟ أنت مبتعبرنيش وكأني مليش لازمة!
– وأنا أقول حاجة مش حاسس بيها ليه؟
صعقها رده البارد الغير مراعي لقواعد الذوق لتصيح بجنون:
– يعني إيه مش حاسس بيها؟ يعني أنت مبتحبنيش؟
هز رأسه بالنفي وكأنها تراه قبل أن يجيبها:
– لأ مبحبكيش.. أنا أعرف إيه عنك عشان أحبك؟! مقعدتش معاكي غير مرات معدودة وكانت كلها للتعارف.. معرفش عنك غير معلومات قليلة أنتِ اللي قايلاها والله أعلم صادقة فيها ولا لأ.
– إيه اللي بتقوله دا؟ أنت مش خطيبي؟ وبعدين يعني هكذب عليك ليه؟
– والله مش عارف هتكذبي ليه! اسألي نفسك كذبتي ليه وأنتِ بتقولي إنك بتخافي ربنا وبتتمني تلتزمي بضوابط الخطوبة.. هي دي الضوابط اللي قلتِ عليها! إنك تتصلي بيا الساعة تلاتة بعد نص الليل وتقولي لي مبتقوليش بحبك ليه؟! دا الإحترام اللي قلتِ هتعامليني بيه وأنت بتكلميني بقلة ذوق وتعلي صوتك عليا كأني عيل صغير..
ارتفعت وتيرة أنفاسها وسألته بصوت حاولت جاهدة أن تستدعي فيه الهدوء:
– أنت بتلومني عشان بعاتبك؟!
– دا مش عتاب دا عدم احترام.. العتاب مبيكونش بالطريقة دي.. دا غير إنه الإنسان بيكون ليه حق فيه.. أما أنتِ فملكيش عليا حق في كل اللي بتطلبيه.
قابلت حديثه بالصمت قبل أن تنطق بعد صمت لا بأس به
– بس أنا مش عاجبني النظام دا.. أنا عايزة أحس إني مخطوبة.. كدا الخطوبة ملهاش لازمة
– وأنا من البداية اتفقت معاكي على كدا ويمكن أنتِ اللي بدأتِ الكلام عن الضوابط ليه دلوقتي بتغيري الكلام.. وبعدين تحسي إنك مخطوبة بعد العقد لكن دلوقتي فاحنا لازم نرضي ربنا يا آنسة فيروز عشان يرضى عننا ويبارك لنا في حياتنا.
لو كان بموقف آخر لكان اقترح عليها عقد القران ولكن كيف سيفعل ويعقد عليها وكل ما يجده منها لا يسره؟! فاق من شروده على جوابها:
