رائعة ج ٦
ابتسمت هايدي في استهزاء ، ورمقته بنظرات أكثر استعلاء ، ثم …
-هايدي بنبرة فظة ، ونظرات وقحة : مش لايق عليك جو التهديد ده يا .. يا سيادة الرائد ، معمركش هاتكون أحسن مني برضوه !
-يزيد بنظرات حـــانقة ، ونبرة متشنجة : غصب عنك بمليون مرة هاكون أفضل ، وأنا بقيت المقدم يزيد جــودة يا بنت الـ ..آآ..
-هايدي مقاطعة بنظرات متفحصة تحمل الاستنكار ، وبنبرة استهزاء : ايه ده بجد .. مقدم مرة واحدة
ثم تعالت ضحكاتها الرقيعة التي تحط من الشأن ، ورمقته بنظرات أكثر استهجاناً و…
-هايدي بنبرة مستفزة تحمل الإهانة : لولا صاحبك اللي جالي واسترجاني وباس ايدي من سنين عشان أسيبك ، كان زمانك محصلتش حتة عسكري مايسواش
-يزيد بنبرة صـــادحة ، ونظرات نارية : اخرسي
ثم رفـــع يده عالياً في الهواء مهدداً بصفعها على وجنتها ، ولكنه توقف عن فعل هذا في اللحظة الأخيرة ، فرمقته هي بنظرات ساخطة و…
-هايدي بنبرة متشنجة وهي تشيح بيدها : فكر بس تلمسني وأنا هاخليك تندم لأخـــر يوم في عمـــرك
-يزيد بنبرة مهددة ، ونظرات شرسة : قسماً بالله يا هايدي ماهرحمك ، ماهسيبك يوم تتهني فيه بحياتك ، أنا لو بس حاطيتك في دماغك هحول حياتي لجحيم ، هاعيشك في كابوس ، وانتي عارفة كويس إني أقــــدر أعمل كده .. احسنلك احذريني .. انتي لسه ماشوفتيش مني حاجة
ضحكت هايدي مجدداً بطريقة مستفزة على تهديد يزيد الصريح لها بالانتقــام ، ولكن بدأت ضحكتها تتلاشى تدريجياً حينما فكرت بإمعان فيما قاله ، وبدأت تربط خيوط الأحداث الأخيرة مع ما قاله .. و…
-هايدي متسائلة بتوجس ، وبنظرات ثاقبة : انت بتهددني ؟
-يزيد بصرامة ، ونظرات جامدة ومحذرة وهو يشير بيده : سميه زي ما تسميه ، لكن أنا لو طلعت في دماغي أدمرك ، قسما بالله ما هصبر ، في لحظة هتلاقيني ماحيتك من على وش الدنيا ، الهيلمان اللي انتي عملاه ده كله هيتنسف في ثانية .. ده أنا أعرف عنك بلاوي لو بس فكرت أكلم مش هتعرفي توري وشك للناس
-هايدي وهي تبتلع ريقها في توتر ، وبنظرات شبه مضطربة : هــاه .. انت .. انت بتقول ايه ؟
-يزيد بنبرة اكثر صلابة ، ونظرات قاسية : اللي سمعتيه يا هايدي هانم ، يزيد بتاع زمان خلاص معدتش ليه وجود ، واللي قدامك ده واحد تاني خالص غير اللي تعرفيه
