مستنيك 3الاخبر
_أنا مش عايزة أي حاجة تفكرني بيه وبعدين هعمل ايه بالفلوس دي كلها خليهاله.. مش دي الفلوس اللي افتكرني طمعانة فيها.. خليهمله ياقمر.
هزت قمر رأسها بينما استمعا لطرقات الباب فقالت قمر:
_ده أكيد بدر جاب الأكل وحجز تذاكر السفر.. انتِ متأكدة انك هتكوني كويسة لما نسافر.
_متأكدة طبعاً.. كتر خيركم قوي أنا مش عارفة أشكركم ازاي وخصوصاً بدر اللي رضا يخليكي تسافري وانتِ حامل.
نهضت تتجه للخارج وهي تقول:
_بطلي عبط.. ده أقل واجب.. وبعدين أنا عديت التالت.
اختفي صوتها فابتسمت رقية بحنان قبل أن يعاودها الحزن وذكري لصوت غريب وهو يردد نفس كلماتها الأولى حين شكرته علي اعتنائه بقدمها في البلدة.. تباً له ولذكرياتها معه والتي تنهش قلبها بحنين محرم.. تحاول بكل قوتها لفظه من قلبها ولا فائدة من ذلك حتي الآن.
_______
كان غريب يسحب تحية من يدها يجرها إلي منزل مراد حين توقف علي الباب وصوت نيفين الثائر يصله:
_أنا زهقت يامراد، بناقص غريب ده خالص.. صدقني مفيش فايدة، ده آخر مرة شوفته كان تقريباً بيطردني من مكتبه.
قال مراد بحنق:
_انتِ اللي بتروحيله كتير المكتب وده راجل بتاع شغل يعني خفي حبة يانيفين.. وبعدين اياكي أسمعك تقولي بناقص غريب دي تاني.. مش بعد كل اللي عملناه هنيجي دلوقت ونقول بناقص.
_وده فيه حاجة بتأثر فيه.. أنا قولت بعد مافرقنا بينه وبين مراته هيجري ويترمي في حضني بس الأستاذ طلع جبلة ومعندوش احساس.
أزاح غريب الباب الموارب ودلف إلي المنزل يقول بسخرية:
_الجبلة وصل ياست نفين.
ظهرت الصدمة علي وجه نفين بينما استقام مراد ناهضاً يقول بتوتر:
_سيبك منها ياغريب.. انت عارف انها عصبية ولسانها طويل بس قلبها طيب وبتحبك.
_وانت قلبك ايه يامراد طيب زيها؟
تطلع مراد إليه وإلي تحية الباكية جواره قبل أن يقول:
_هو فيه ايه ياغريب؟ والبت دي بتعيط ليه؟
_فيه إني اتخدعت فيك ياصاحبي كنت دايماً أقول انك غيرهم بس آن الأوان أفتح عيوني وأشوف انك زي أختك وأبوك، أفاعي بتلبس توب الفضيلة وفي أول فرصة بتخونوا وتلدغوا.
اقترب منه يقول بسرعة:
_غريب متصدقش……
قاطعه بلكمة قوية في وجهه ألقته أرضاً ثم ذهب إليه ومال يمسك ياقة بذلته يقول بقسوة:
_اسمي متنطقوش علي لسانك تاني ولو شوفتك في أي مكان هضربك قصاد الكل فتحاشاني أحسنلك.. اللي زيكم ربنا بينجيه منهم ويفتح عيونه علي زيفهم وسواد قلوبهم بسبب دعوة واحدة بس “واصرف عني ياالله شر ما قضيت”.
