مستنيك 3الاخبر
نهضت نفين تأخذ حقيبتها فقطبت سوزان جبينها قائلة:
_انتِ رايحة فين؟
_افتكرت ميعاد مهم قوى هشوفك بعدين.. سلام.
غادرت نفين علي عجلة وسط حيرة صديقتها بينما اتجهت الأولي إلي سيارتها الفاخرة ودلفت إليها تأخذ نفساً عميقاً تحاول به تهدئة انفعالها فلم تستطع لتضرب المقود بغضب ضربات متتالية قبل أن تنهمر دموعها بغزارة وهي تنتحب قائلة:
_مبسوطة دلوقتي ياست نفين؟ بكرة يقولوا عنك اللي قالوه عن رودي وبكرة يشمتوا فيكي ويصّعبوا عليكي، تستاهلي فعلاً.. انتِ اللي جيبتيه لنفسك.. جريتي ورا الفلوس وكانت كل همك.. عملتلك ايه الفلوس دلوقت مع واحد زي الحيوان اللي اتجوزتيه.. مين دلوقت هينجدك منه؟ أخوكي اللي أول ماباعك وقبض التمن سافر برة وقفل تليفونه؟ ولا قرايب مامتك اللي كانوا طمعانين فيكوا وأول ماعرفوا انها قضية خسرانة قاطعوكي.. هتروحي فين دلوقت يانفين؟ هترجعيله يضربك ويعذبك ويعاملك أسوأ معاملة ممكن حد يعاملهالك ولا هتهربي؟ وتهربي تروحي علي فين وانتِ متملكيش حتي العربية اللي انتِ راكباها دي؟ شوفتي آخرتها ايه يانفين؟
رن هاتفها فتطلعت إلي شاشته، إنه هو.. ارتعدت أوصالها تدرك أنه اكتشف رحيلها دون اذنه، سيحطم عظامها بكل تأكيد.. ماالذي ستفعله الآن؟إلي أين المفر؟ ظلت علي هذا الحال بضع لحظات قبل أن تلتمع عيناها و تقود سيارتها متجهة إلي الطريق الدولي بسرعة جنونية لا تبغي سوى موت محتوم يخلصها من عذابها التي باتت تعيشه في كل ثانية.
_______
بعض النفوس حين تُخطئ وينجيها الله لا تتعظ بل تتمادى وتظن أنها ستفلت بأفعالها في كل مرة.. الخطأ يُغفر بعد توبة ولكن حين تُصر عليه فلا تنتظر سوى نهاية عادلة وعقاب لكل اثم اقترفته ليصيبك الندم وقت لا يفيد الندم.
قالت تحية :
_أنا مش عارفة أقولك ايه ياست نعمات ومش عارفة أرد جمايلك عليا ازاي؟ لولاكي ولولا سؤالك وودك علي ولادي كانوا هيضيعوا.
قالت نعمات بطيبة:
_متقوليش كدة ياتحية، ولادك بقوا ولادي.. ربنا يحميهم ويبارك فيهم.
أطرقت تحية برأسها قائلة بحزن:
_من ساعة مادخلت السجن ودي بقت دعوتي في كل صلاة، ربنا يحميهم ويبعد عنهم شر نفسهم، وبدعي ربنا ليل ونهار ميبقوش زيي، حذرتيني كتير ياست نعمات ومسمعتش كلامك ودي النهاية، محبوسة بين أربع حيطان ومحرومة من ولادي.. خايفة عليهم قوي ياست نعمات.
