مستنيك 3الاخبر
_بعيد الشر عنك.
همستها الضعيفة جعلته يقطب بحيرة قبل أن تنفرج أهدابها عن مقلتيها العسليتين تتطلع إليه بوهن فنطق حروف اسمها بلهفة، سعلت فأسرع يمنحها كوب من الماء تلامست أناملهما فانتفضت ترتشف منه رشفة ثم تتطلع إليه بصدمة، كاد أن يبعد الكوب عنها ولكنها تمسكت بأنامله المحيطة بالكوب تقول بعدم تصديق:
_انت بجد هنا جنبي والكلام اللي سمعته منك كان حقيقي؟
ابتسم يتطلع إليها بحنان فقالت برجاء:
_عشان خاطري يابدر قولي اني مبحلمش وانك حقيقة قدامي شايفاها بعينيا ولمساك بايديا.
ربت بيده الحرة علي أناملها فتركت الكوب ليضعه جانباً ثم يمسك يديها بين يديه وهو يقول :
_أيوة أنا حقيقة ياقمر شايفاني بجد ولمساني وتقدري تقرصيني لو لسة مش مصدقة.
_طب ازاي.. انت قولت انك.. انك….
_بحبك.
تعلقت عيناها بعينيه كما تعلق الأمل والرجاء بمقلتيها فابتسم قائلاً:
_أنا فعلا بحبك.
_طب وسارة ومروة؟
_سارة ماضي هيفضل في قلبي ليها مكان أما مروة فخيال ملوش أي أساس في الواقع اخترعته عشان أبعدك عني.
خبا الأمل بعينيها وظهر الحزن جلياً وهي تقول:
_مكنتش محتاج سبب عشان تبعدني عنك، كان كفاية إنك تطلبها مني زي ماعملت.
_البني آدم اللي كنته امبارح مش اللي بيكلمك دلوقتي.
قطبت جبينها قائلة:
_قصدك ايه؟ محدش بيتغير بين يوم وليلة يابدر.
_ومين قالك انهم يوم وليلة.. اللي حصل خلاني أفتح عيوني وأشوف الحقيقة اللي غابت عني، مشاعري ليكي اتولدت من سنين افتكرتها مشاعر أخوة واتعاملت علي الأساس ده، لو كنت فكرت للحظة انها ممكن تكون غير كدة كنت هفهم مشاعري واتصرف علي أساسها. لما سارة الله يرحمها ماتت… انتِ اللي وقفتي جنبي، خرجتيني من عالم قفلت فيه علي نفسي وكان هيضيعني، رجعت مشاعري تظهر للسطح من تاني ورجعت أديها اسم غير اسمها، امتنان عرفان مش مهم المهم اللي جه بعدين وكان لازم يكون اشارة ليا بس فضلت مغمي عينيا.
نظرت إليه بفضول ولهفة تستحثه علي الكلام فابتسم قائلاً:
_لما ماما عرضت عليا أتجوزك ورغم انها فاتحتني كتير في موضوع الجواز قبل كدة وكنت برفض رفض قاطع، لقيتني بسهولة بوافق بحجة انقاذك وانقاذي من زن الأمهات، دي كانت اشارة واضحة بس للأسف مفهمتهاش وحياتي معاكي تحت سقف واحد وراحتي وسعادتي اللي كانوا بيخلوني أسيب الدنيا كلها أول ماأخلص شغل وأجري علي البيت.. حتي لما سمعتك وانتِ بتعترفي بحبك ليا تحت تأثير الحرارة وفرحتي باعترافك ده وبعدين خوفي منه.. مش عليا بالعكس عليكي لما حسيت اني ممكن أظلمك لو عشتي مع حد من غير قلب زي ماكنت فاكر.. كل ده كان حب ليكِ واهتمام بس أنا مفهمتش كل ده.. عارفة فهمت امتي؟فهمت لما كنتي هتروحي مني، لما حسيت للحظة انك ممكن تفارقيني وأعيش في الدنيا دي من غيرك.. وقتها حسيت ان أنا اللي بموت وبتخرج روحي مني.
