مستنيك 3الاخبر

_______

كل الأشياء تتعارك بداخلي، مشاعري.. مخاوفي.. ماضيّ وحاضري.
منذ متي تسللتي إلي قلبي؟ منذ متي صار يهواكِ؟ ألم يكن راهباً يتعبد في محراب سواكِ؟ ألم يقسم علي الوفاء فلم يكن لحواء آملاً في سكناه فآواكِ؟ هل رأي فيكِ طيفها فناجاكِ؟ مستحيل.. فقلبي لا يخلط بين النساء فإياكِ.. لا تظني بي الظنون حاشاكِ.. لقد أحببتك أنتِ ورأيت فيكِ ملاكي، طيبة قلبك عذب لسانك وحسن معشرك جذبوا خفقات قلبي فرآكِ، وحين رآكِ أدرك أنك جوهرة أرادها ثم لفظها فآذاكِ، قلبي المتيم بحبك نادم يتضرع تحت قدماكِ.. افتحي أهدابك المغلقة وتطلعي إليه بعذب عيناكِ، سأجثوا معتذراً أطلب الصفح لا أخشى مذلة فاعتذار العاشق لمعشوقته واجب لا أمنحه لسواكِ.

همس ضعيف باسمه جعل قلبه يتلوي داخل صدره بلهفة ولوعة، مال يطبع قبلة حارة علي كفها بين يديه ثم نظر إلي محياها الرقيق يقول بألم:
_أنا هنا ياقمر، فتحي عيونك وبصيلي..أنا أستاهل أي حاجة تعمليها فيا غير إنك تسيبيني.

_بدر.

_حبيبة بدر.. سامحيني.. كنت فاكر اني صح، كنت فاكر اني بحميكي من العيشة مع واحد من غير قلب، بس القلب اللي بيدق جوايا دلوقت أكدلي اني كنت غلط، القلب ده خلاني عرفت انه لسة حي لما حبك انتِ.. ازاي وامتي.. مش عارف، يمكن من زمان.. من زمان قوي لما كنت بتخانق مع صحابي لما يقولوا عنك كلمة حلوة أو يبصولك.. كنت فاكر انها غيرة أخ علي أخته بس دلوقت شوفتها صح.. كان لازم أعرف ان غيرة الاخوات حاجة وغيرة الحبيب علي حبيبته حاجة تانية خالص، عارفة لما كنت فاكر اني بسيبك عشان واحد تاني، كان المفروض الحزن اللي جوايا والنار اللي قادت في قلبي يقولولي اني حبيتك بس فضلت فكرة الأخوة اللي بينا عمياني عن الحقيقة اللي أمي كانت شايفاها ولمحتلي بيها في آخر مرة كنت فيها معاها، قالتلي يابدر فتح عينيك واسأل قلبك قبل ماتخسر أحلي حاجة ممكن تكسبها في الدنيا دي بحالها، والحاجة دي هي انتِ.. انتِ ياقمر.

تساقطت دمعة من عينيها فمد أنامله يمسحها برفق قائلاً بصوت أجش:
_آسف ياقمر، آسف علي كل دمعة نزلت من عنيكي بسببي، آسف لو وجعتك بقصد ومن غير قصد، كنت غبي وأعمي والحمد لله اني فتحت قبل فوات الأوان، لو كنت خسرتك كنت خسرت نفسي لإني مستحيل هقدر اعيش من بعدك يابنت خالتي.. الموت عندي أهون.