مستنيك 3الاخبر
_شوفوا مين اللي بتتكلم؟ مش جوزك برضه كان متجوزك غصب فجأة بقيتي عسل بالنسبة له وعليكي قشطة، ده الراجل مكنش عايز يخرج ويسيبك لحظة واحدة لولا اتكسف مني، ده أنا حسيت انه شوية شوية هيقولي انتِ ايه اللي جابك دلوقتي؟
_معاكي حق في دي.. غلبتيني يابت ياروكا.. الظاهر ان احنا قسمتنا واحدة، احنا الاتنين رضينا نتجوز من غير مشاعر، انتِ مكنتيش بتحبي غريب وبدر مكنش بيحبني لكن الظاهر ان العشرة بتبين للشريكين ان ربنا اختارهم لبعض لإن كل واحد فيهم قدر التاني ونصه اللي بيكمله.
_فعلا ياقمر، عارفة اليوم اللي سافر فيه غريب وكنت بودعه في المطار، اليوم اللي رجعنا فيه من كفر أبو جبل.. فضل ماسك ايدي لحد ما سمع النداء الأخير لطيارته، وقتها ابتسملي وقالي خلي بالك من نفسك لحد ماأرجع وبعدين ساب ايدي ومشي ناحية البوابة، أنا حسيت بروحي بتنسحب مني مع كل خطوة بيمشيها، كنت عايزة أجري أقف قدامه وأمنعه من السفر، أقوله عشان خاطري خليك جنبي أنا حسيت ان روحي بتفارقني بروحتك بس مقدرتش.. بأي حق همنعه ولحد دلوقتي ورغم اني حاسة انه بيبادلني مشاعري بس محدش فينا اعترف بيها للتاني بصراحة.. مش عارفة مستنيين ايه بس؟
_مستنيين معجزة تفك لسانكم انتوا الاتنين، أقولك انتحري زيي يمكن انتحارك يفك لسانه هو كمان.
وكزتها رقية قائلة بحنق:
_بتفكريني ليه بالعملة الهباب اللي عملتيها، افرضي كنتِ موتي بجد، ازاي هانت عليكي نفسك، مخوفتيش من عقاب ربنا، ده القانط من رحمته في النار ياقمر مبيشمش ريح الجنة حتي.
ارتعش جسدها حين تذكرت ما كادت أن تفعله بنفسها لتقول بخوف:
_وأنا لو كنت فكرت للحظة واحدة في ربنا كنت عملتها، للأسف كنت ضعيفة وعماني شيطاني لما صورلي إن الحل الوحيد عشان أتخلص من عذاب شوفة بدر مع واحدة غيري هو الموت، الشيطان شاطر يارقية وبيستغل ضعفنا ويوهمنا ويقنعنا لحد مانغلط، ساعات بنفوق ونهزمه بعد مانصلح غلطنا وساعات الوقت بيفوت ويفوز ابليس.
_الشيطان مش شاطر بالعكس، ده أضعف كائن خلقه ربنا، قوته بتيجي من قلة الإيمان، خلي ايمانك قوي ياقمر، قويه كمان وكمان بيقينك في الله..يقينك في انه شايلك الخير مهما ضاقت، ده ان مع العسر يسراً واحمديه علي حبه ليكي اللي أنقذك في الوقت المناسب ودايماً رددي الآية الكريمة.. وعسي أن تكرهوا شيئاً وهو خير لكم.
