مستنيك 3الاخبر

_متخافيش عليهم، طول ماانا جنبهم يابنتي.

رفعت رأسها تتطلع إليها بامتنان قائلة:
_تعرفي ياست نعمات لما وقعت في الأزمة دي بعد ماسرقت الناس اللي اشتغلت عندهم بعدكم وعرفت انه عقاب ربنا لاني متعظتش وفضلت ماشية في السكة الشمال، مخوفتش علي نفسي قد ماخفت علي ولادي من بعدي، هيروحوا فين ومين هياخد باله منهم، ورغم ان أهل أبوهم موجودين بس خوفت يكرهوهم فيا، مخطرش في بالي غيرك انتِ، عقلي رفض اني أكلمك وقالي أكيد هترفض بعد كل اللي عملته معاكي بس قلبي قالي كلميها، الست دي فيها من الطيبة اللي يخليكي تآمني علي ولادك معاها وتبقي مطمنة.. كلميها يمكن توافق وتنقذك.. ووافقتي، وافقتي رغم كل شيء، وافقتي وريحتي قلبي ربنا يريح قلبك ويسعدك دنيا وآخرة زي ماريحتيني وفرحتيني.

_يابنتي اللي بيفرج هم الناس قليلة الحيلة ويقف معاهم ربنا بيفرج همه وانتِ مهما كان ولية مكسورة الجناح، أنا مش عايزاكي تشيلي هم ياتحية من هنا لحد ماتخرجي من المكان ده.. وفوقي لنفسك عشان خاطر عيالك.

_أخبارهم إيه؟ بيسألوا عليا؟

_كل يوم.

_لسة بتقوليلهم مسافرة؟

هزت نعمات رأسها فأردفت بحزن:
_بكرة يكبروا ويعرفوا الحقيقة.

_سيبك من بكرة وركزي في النهاردة، عافري عشان تخرجي بسرعة وتعوضيهم اللي فات بطيب سلوكك وحنيتك والتزامك.. ربنا بيغفر وبيسامح وولادك مسيرهم يسامحوا لو شافوا منك توبة بجد.

_والله العظيم تُبت وبستغفره علي ذنوبي ليل ونهار.

_وربنا غفور رحيم..قادر يسامحك ويخلي ولادك يسامحوكي.

_يارب ياست نعمات.. يارب.

_____

نرفض أوامر الكبار، نعترض علي تصرفاتهم ونحتج بقوة، نقسم أن لا نسير علي نفس الخطى حين نكبر حتي نكبر فنجدنا نسير علي نهجهم، نقلد تصرفاتهم، من يتطلع إلينا يجدنا نسخة مصغرة مما اعترضنا عليهم يوماً، نخشى أن يكون مصيرنا كمصيرهم، نحاول الهرب قدر مانستطيع، نبذل قصارى جهدنا لتبديل النهاية ولكننا في آخر الأمر نجد أنها محتومة فإن صرنا مثلهم فالنهاية ستكون واحدة لا محالة.

خرج مراد مترنحاً من هذا النادى الليلي، قد أفرغ خيبته وغضبه في معاقرة الخمر بعد أن خسر جلّ ماله في اللعب هذه الليلة، توقف يخرج علبة سجائره ويخرج واحدة يشعلها بعد محاولات عديدة، يأخذ نفساً عميقاً منها ويطلقه، يتطلع إلي الدخان المتصاعد يفكر في حياته التي تشبه هذا الدخان، من عدم إلي عدم، تؤذى أقرب الناس إليها بل تؤذى كل من حولها لا تساوى شيء ولن تساوى مهما فعل.