رائعة ج ٤
اكفهرت ملامح فوزية سريعاً ، وزمت شفتيها في استهجان و…
-فوزية بنبرة ممتعضة : متقولش بنتك يا أستاذ بركات ، انتو نسيتوا عملتوا فيها ايه ؟
-بركات بنبرة متمهلة : معلش يا حاجة فوزية ، أنا بعتذرلك على اللي مراتي عملته ، احنا برضوه كنا نسايب
-فوزية مقاطعة بحدة : دي جابت من الأرض وحطتت على بنتي ، وتقولي نسايب
-بركات بنبرة حزينة : أنا أسف يا حاجة ، امسحيها فيا ، هي برضوه أم وزعلانة على ابنها
-فوزية بنبرة متهكمة : ابنك اللي ضحك على بنتي واستغفلها ، وراح اتجوز وخلف كمان
أطـــــرق بركات رأسه في آسف ، ثم أجفل عينيه للأسفل و..
-بركات بنبرة منكسرة : دي مشيئة ربنا
-فوزية بنبرة محتقنة : مشيئة ربنا انكم تربطوا بنتي جمبكم سنتين ، وتكسروا قلبها ، وابنكم عايش حياته ومتهني
-بركات بنبرة أكثر حزناً : أنا أسف يا حاجة فوزية ، بس خلاص هو راح عند اللي خلقه ، وأنا جاي النهاردة عشان أرد الأمانة لأصحابها .. ميراث بنتك
-فوزية بنبرة متشجنة : لا أنا ولا بنتي عاوزين منكم حاجة
-بركات بنبرة مُصرة : بس ده حقها الشرعي ، وأنا مقدرش أتغاضى عنه
-فوزية بنبرة حادة للغاية : قولتلك مش عاوزين أي حاجة تيجي من طرفكم ، انسونا بقى ..!!
ثم صفعت الباب بحدة في وجهه دون أن تنتظر اي رد منه ، وظلت تبكي في مرارة وهي تتذكر ما حدث مع ابنتها من خداعها تحت اسم الحب ….
………………………………..
ســـــار منذر بخطوات واثقة في اتجاه فرح التي كانت مندمجة بتصوير بعض الأطفــال وهم يرقصون على أنغام الموسيقى العالية ، ثم وقف إلى جوارها و…
-منذر بنبرة مرحة : استاذة فرح
صدمت فرح حينما رأت منذر يقف بجوارها وعلى وجهه ابتسامة بلهاء ، وتبدلت ملامح وجهها سريعاً للإنزعاج .. في حين استدار يزيد ناحيته ليرمقه بنظرات محتقنة و..
-يزيد بنبرة متشنجة : ايه اللي جابك هنا ؟
-منذر ببرود : كلنا موجودين هنا يا سيادة المقدم ، واضح ان حضرتك نسيت
زفــــــر يزيد في انزعاج ، في حين التفت منذر بجسده كلياً ناحية فرح ورمقها بنظرات إعجاب شديدة و..
-منذر بنبرة حماسية : أنا محظوظ اني اتعرفت على واحدة محترمة وجميلة زيك
-فرح بإقتضاب ، ونظرات جامدة : شكراً
-يزيد بحنق وهو يشيح بوجهه الناحية الأخرى : استغفر الله العظيم
