رائعة ج ٤

زفــــر يزيد في ضيق جلي ، و…
-يزيد بنبرة حانقة : يوووه ، انت مش هتحل عني السعادي ولا ايه ؟
-آدم بنبرة هادئة : خلاص يا سيدي ، بس الصراحة كنت قمة النهاردة ، بجد انت عجبتني ، بس ايه رأيك في تكتيكي ، أنفع صح ؟
-يزيد بنبرة مغتاظة : ده أنا كان بودي أحط فيك لغم وأفجرك لما عرفت ان ليك يد في اللي حصل
-آدم متوجساً : يا ساتر يا رب ، أد كده بتحبني
-يزيد بنبرة شبه متعصبة : كنت عاوز تهزأني قصاد الكل
-آدم بنبرة متلهفة ، ونظرات جادة : أبداً والله ، ده أنا بس لما بلغت بإن عندنا حالة فوبيا من المياه ، فاطلب مني بالأمــر إني أجي عند مركز القيادة ، وأشارك في تنفيذ الخطة الطارئة اللي اتحطت
-يزيد بتهكم : وطبعاً انت ما صدقت
-آدم بنبرة واثقة ، ونظرات مغترة : أكيد ، دي فرصة مش بتكرر كتير
-يزيد بتوعد : مسيري أردهالك
-آدم بنبرة شبه قلقة ، ونظرات مرتبكة : يا رب تنسى ، ومتفتكرش ، لأحسن أنا عارف زعلك وحش
-يزيد بنبرة جـــادة : يا ريت تبقى تفكر قبل ما تعمل حاجة تانية زي دي

تنهد آدم في ارتياح ، ثم توجه للفراش المعدني ، وجلس على طرفه ، وثنى أحد ساقيه من أسفله و…
-آدم متسائلاً بنبرة متحمسة : قوليلي هاتعمل ايه بكرة ؟
-يزيد بعدم فهم : أعمل ايه في ايه ؟
-آدم بنبرة لئيمة : مع الجو
-يزيد بجدية : جو ايه ؟ أنا مش فاهم حاجة

رمـــق آدم يزيد بنظرات غريبة ، وظل يتمتم مع نفسه بخفوت و..
-آدم بنبرة أقرب للهمس : ما انا لو قولتله إن الجو هو فرح يمكن يقلب بأعاصير وزوابع .. طب أجيبهاله إزاي دي

نظر يزيد إلى آدم بنظرات حائرة وهو عاقد أحد حاجبيه في استغراب و…
-يزيد متسائلاً بنبرة هادئة : انت بتكلم نفسك ؟

انتبه آدم إلى يزيد ، ونظر إليه بنظرات متوجسة و…
-آدم بنبرة شبه مرتبكة : هــه .. آآ.. أه ، متخدش في بالك
-يزيد وهو يمط شفتيه : طب يالا وريني عرض كتافك خليني أنام

نهض آدم عن الفراش ، وعدل من ملابسه ، ثم ..
-آدم وهو يزم شفتيه : طيب .. وأهوو بكرة هايطلع برزقه
-يزيد بعدم فهم ، ونظرات جادة : رزق ايه ؟ أنا مش فاهم أي حاجة من اللي انت بتقولها
-آدم مازحاً : أصل أنا بحب أهلوس مع نفسي ، فمتركزش معايا
-يزيد مبتسماً من زاوية فمه : طب يالا ، تصبح على خير
-آدم بهدوء : وانت منه أهله ..