مستنيك 2
نهضت بدورها تقول بارتباك :
_وأنا هعملنا أكل تاني بدل اللي وقع…..
قاطعها قائلاً:
_متتعبيش نفسك.. أنا هطلب بيتزا.
_أنا بحب البيتزا قوي.
_عارف.
قالها بلهجة حانية مست قلبها فتطلعت إليه بنظرة أربكته مجدداً ليبعد ناظريه عنها وهو يبحث عن المكنسة اليدوية كي ينتهي من تنظيف المكان ويغادره وقد بات قربها مؤخراً محير ومربك لسبب لا يدركه.. أو أنه يخشي إدراكه.
______
_ما خلاص يامراد.. قولتلك إني مش زعلان، نفين اعتذرت لرقية وده بينهي عندي الموضوع كله، لو خلصت كلام يبقي يلا نخرج نقعد معاهم، ميصحش نسيبهم كل المدة دي لوحدهم.
رفع مراد حاجبه وهو يردد قائلاً:
_ميصحش.. قولتلي.. ممكن برضه.
تأمل مراد ملامح غريب النافذة الصبر وكأنه لا يطيق عن زوجته ابتعاداً ثم مال فجأة يقترب من غريب أكثر وهو يتفحص ملامحه باهتمام قائلاً:
_إلا قولي ياغريب.. انت مش كنت قايلي انك اضطريت تتجوز رقية عشان خاطر والدك الله يرحمه وإنك أول ماتتطمن عليها هتطلقها.
هز غريب رأسه دون أن ينطق بكلمة ولكن ملامحه المتوترة أخبرت مراد بما أراد معرفته، ليلعن في سره قبل أن يقول:
_بتهيألي موضوع انها في خطر وأهلها عايزين يقتلوها كانت تمثيلية من عمي عزيز الله يرحمه عشان يدبسك في الجوازة دي.
نهض غريب يقول بنفي:
_معتقدش.. هيدبسني ليه يعني؟
نهض مراد قائلاً:
_انت ناسي انك في آخر مرة اتكلمت معاه قبل ماتسافر لما كان عايز يجوزك بنت شريكه في مصنع الفيوم انت قولتله انك مبتفكرش في الموضوع ده نهائي وان الجواز مبقاش خلاص في دماغك .. نسيت كان زعلان ازاي وانت حاولت ترضيه وتقوله انك هتفكر بس أكيد والدك كان عارف انك بتسايسه وان الجواز بقى بالنسبة لك شيء لا يمكن تفكر فيه.
_لنفترض كلامك صح.. لو بابا عايز يدبسني هيدبسني مع بنت شريكه، ايه اللي يخليه يدبسني مع واحدة تانية؟
_انت بتستهبل ياغريب..ما بنت شريكه اتجوزت وانت عارف وبعدين الواحدة التانية دي حتة مارون جلاسيه….
قاطعه قائلاً بحنق:
_مراد!
_خلاص ياسيدي متزعلش.. البنت حلوة وليها سحر،تقدر تنكر إنها قدرت تغير فكرتك عن الجواز في فترة قصيرة جدا وتعلقك بيها…
كاد غريب أن يتحدث ولكن مراد أشار له قائلاً:
_متنكرش، ده انت مش طايق مني كلمة عليها، الغيرة باينة في عيونك ياصاحبي، المشكلة هنا انك بتسمحلها تدخل قلبك مع ان العلاقة دي نهايتها الفشل.. معقول غريب المنياوي يتجوز واحدة لا ليها أصل ولا فصل جايبها باباه من الشارع، لأ ويحبها كمان؟
