مستنيك 2
_هي بتبصلك كدة ليه؟ وإيه الفستان الإسود اللي هي لابساه ده.. ضيق وفوق الركبة ولا الميكب الأوفر اللي هي حطاه ده، هي مش آخدة بالها إنها جاية عزا؟
_قولتلك سيبك منها.
_إلحقي دي جاية علينا.
رفعت رقية وجهها فوجدت هذه الفتاة تتجه إليهما بالفعل، تتوقف أمامهما تماماً وهي تقول بسماجة:
_البقاء لله يا.. يامدام.
لم تتحرك رقية وهي تهز رأسها بهدوء فأردفت المرأة قائلة:
_قوليلي هي المدام تقرب لآنكل عزيز إيه؟
قالت قمر بغيظ من لهجة هذه الفتاة الساخرة:
_مرات ابنه ياحبيبتي، انتِ مش كنتِ حاضرة كتب الكتاب ولا نسيتي، معلش يهده الزهايمر مش سايب كبير ولا صغير.
_انتِ مين انتِ كمان؟ وإيه الأسلوب البيئة اللي بتكلميني بيه ده؟
نهضت قمر تقول بغضب:
_بيئة.. اقفي عوج واتكلمي عدل ياست انتِ، انتِ اللي مين عشان تكلمينا بالشكل ده؟
نهضت رقية بسرعة تمسك يد صديقتها وهي تقول برجاء:
_عشان خاطري ياقمر، سيبك منها.. عشان خاطر عمي عزيز الله يرحمه.
_انتوا اتجننتوا ولا إيه.. مش عارفين بتكلموا مين؟ أنا نفين عز الدين.. بنت رأفت عز الدين.. تصدقوا ! أنا اللي غلطانة إني عبرتكم أساساً وجيت أعزيكم.
_الغلط يترد وتمشي حالاً من المكان مادام مش قادرة تحترمي أصحابه يانفين.
صوته العميق الصارم جعلهم جميعاً يستديرون إليه، تطلعت نفين إليه بذهول قائلة:
_انت بتطردني عشان شوية الجرابيع دول ياغريب؟
صار صوته قاسياً كما لم يكن قط حازماً وهو يقول :
_اللي بتتكلمي عنهم دول يبقوا مراتي وصاحبتها، عارفة يعني إيه تهيني مرات غريب المنياوي، يعني بتهينيني أنا شخصياً وأنا مستحيل أسمح بالإهانة ليا أو لحد من عيلتي.. ثواني وألاقيكي برة بيتي.. مفهوم؟
_غريب أنا…..
هدر قائلاً لمراد الذي أصبح جواره الآن:
_خد أختك من قدامي دلوقت يامراد، أنا لسة عامل اعتبار ليك بس قسماً بالله ثواني وهطردها بنفسي ومش هيهمني أي حاجة في الدنيا.
أسرع مراد يسحب أخته للخارج وهي تردد في هستيرية:
_بقي كدة ياغريب، أنا تطردني من بيتك عشان الجرابيع دول.. ماشي ياغريب.. ماشي.. أنا هوريك.. هوريكم كلكم.
تجاهلها غريب تماماً وهو يلتفت لرقية، يقول بأسف:
_أنا متأسف جداً علي اللي حصل وأوعدك ميتكررش تاني.
_ولا يهمك.. محصلش حاجة.
هز رأسه ثم عاد إلي مكانه بهدوء تتبعه عيناها لتنتبه علي صوت صديقتها وهي تقول:
_الراجل ده حيرني والله بس ملوش حل ، شوفتي طردها ازاي عشانك.. راجل من ضهر راجل.. طالع لأبوه.. مش كدة يارقية؟
