مستنيك 2
مال يقول لها بسخرية:
_بختي المايل.
_بقولك إيه أنا مش ناقصاك أساساً.
لتنهض بعصبية قائلة:
_أنا ماشية وسايبالك النادي…..
قاطعها وهو يسحب ذراعها ويجلسها قائلاً بصرامة:
_أقعدي بقي وبطلي تسرعك الغبي ده.. خسرتي بسببه كتير.. خسرتي غريب و غير غريب.. وبتخسري دلوقتي صحابك ويمكن تخسريني أنا كمان لو سمعت كلمة واحدة أو فضلتي عنيدة ومتسرعة زي ماانتِ.
طالعته دون أن تتفوه بحرف فترك يدها وتراجع في مقعده قائلاً:
_أيوة كدة.. شغلي عقلك شوية.. مش معقول اللي انتِ فيه ده.. مش كل حاجة يترد عليها بعصبية وتسرع.. مليون مرة أقولك عشان متخسريش لازم تبقي هادية وتفكري كويس قبل أي خطوة بتعمليها.
_وتفتكر نصايحك الغالية وصلتنا لفين.. زي ماانت شايف.. ولا أي حاجة.. غريب واتجوز.. لأ وكمان رايح يعمل فرح للهانم مراته في بلدها.. وقربنا خلاص نعلن افلاسنا ونتفضح مابين أصحابنا ومعارفنا.. بعد ده كله عايزني هادية.. أهدي ازاي بس وأنا شايفة حياتي بتضيع مني وللأسف مش عارفة أعمل أي حاجة.
_الموضوع مش سهل وفعلا اتعقد بس علي فكرة تعقيده ده في صالحنا، غريب بدأ يحب مراته.
قالت بسخرية:
_ياراجل.. انت لسة بتاخد بالك؟
طالعها بنظرته الصارمة فأشاحت بوجهها بحنق ليقول هو بهدوء:
_حبه ليها هيخلي صدمته فيها كبيرة ومش هيستني لحد مايتأكد من برائتها، هيرميها للشارع اللي جت منه من غير مايفكر ولا يتردد.
_وده هيحصل امتي إن شاء الله؟ الوقت بيسرقنا يامراد واللي انت بتفكر فيه عايز وقت وطولة بال.
مط شفتيه قائلاً:
_بتهيألك.. الموضوع بسيط ويخلص بسرعة بس محتاجين ندور علي الضحية اللي هتقوم بدور العشيق.
_وده هنلاقيه فين إن شاء الله؟
_هندور في محيطها وبنت زيها أكيد بيحوم حواليها بدل الراجل اتنين وتلاتة، تعرفي لولاكي ولولا اني مش عايز أخسر غريب.. كنت قومت بالدور ده بنفسي.
طالعته بحنق قائلة:
_أنا مش قادرة اعرف فيها إيه البنت دي مخليكم تتمنوها بالشكل ده؟
بها كل ماليس بكِ ياأختي العزيزة..
_سيبك منها وقومي حصلي سوزان وصالحيها..
_اشمعني؟
_محتاج نبيل أخوها في مصلحة.. قومي متبصليش كدة..أهي حاجة تظبط أمورنا لحد مانشوف هنعمل ايه مع غريب.
نهضت نفين علي مضض تأخذ حقيبتها وهاتفها ليوقفها صوته وهو يحذرها قائلاً:
_مش محتاج أوصيكي، المصلحة دي لو باظت زي اللي قبلها يبقي تنسي موضوع غريب وتستعدي للسواد اللي جاي.
