مستنيك 2
_ها.. مش عارفة.. الظاهر كدة ياقمر.
____
_ياهمام بيه.. ياسي همام.. إلحقنا ياشيخنا.
كان يجلس علي كرسيه يستند إلي عصاه ويتطلع إلي الأرض الخضراء الممتدة أمامه بصمت كعادته كل يوم في هذا الوقت حين انتبه إلي غفيره الذي يناديه، فقطب جبينه قائلاً:
_خير ياولد.. عتنادم عليا إكده ليه؟
ناوله صحيفة كانت في يده وهو يقول:
_منصور بيه باعتني ليك بالجريدة دي وبيقولك اقرا الخبر اللي فيها.. لقيناه ياسي همام.. لقينا اللي عتدوروا عليه بقالكم كاتير ومش لاقيينه.
فتح همام الجريدة يتصفحها بلهفة حتي وقعت عيناه علي صورة كبيرة تتصدر صفحة الوفيات، التمعت عيناه بقوة وهو يتطلع إلي ملامح صاحب الصورة ليقول بنبرة توعد :
_والله زمان ياعزيز.. يعني يوم ماالاقيك تكون قابلت وجه كريم.. مش مهم.. فيه ولدك يدفع حسابك وياإما يدلنا علي لحمنا ودمنا اللي ضاع منينا ياإما يدفع التمن وتكون حياته قصاد كل القديم.
قبض علي الجريدة بقوة والذاكرة تعود به إلي الوراء، إلي خمسة وعشرون عاماً علي وجه التحديد..خمسة وعشرون عاماً من الحزن والهم…. والفقد.
الفصل الثامن
_ماشي ياغريب إن ما وريتك.. بقي أنا_نفين رأفت عز الدين_ تطردني من بيتك عشان خاطر البنت البيئة دي!
اقترب منها مراد يقول بحنق:
_ماهو انتِ اللي غلطانة..برضه بتتسرعي وتبوظي الدنيا وفي الآخر مش انتِ لوحدك اللي بتدفعي التمن.. ده أنا كان منظري وحش قوي والكل بيبص عليكي وانتِ بتتطردي من غريب والأستاذ بيطلب مني أخرجك بالذوق أحسن مايخرجك بالعافية.. فضحتينا ياهانم وارتحتي دلوقتي.
اتسعت عيناها باستنكار تقول بعصبية:
_انت هتلومني برضه؟ وأنا كنت عملت إيه يعني؟ أمال لو كنت هزقتها كان هيحصل إيه؟ انت مشوفتش رد صاحبتها البيئة عليا.. أنا مش عارفة عمي عزيز جاب البلاوي دي منين..أكيد من الحواري.
_أهي بنت الحواري قدرت تتصرف أحسن منك.. مغلطتش بكلمة وظهرت بدور الضحية قدامه وزي أي فارس شجاع جه بسرعة وأنقذها منك وطردك قصاد الكل.
_وانت هتسكت علي الكلام ده؟انت لازم ترد اعتباري وتجيبلي حقي.. فاهم يامراد؟
فتح زر جاكت بذلته وهو يجلس علي أقرب أريكة يزفر قائلاً:
_أجيبهولك ازاي ومن مين؟ من غريب المنياوي اللي أكبر ناس في البلد بتعمله ألف حساب.. متحلميش يانفين عشان ميقلبش حلمك كابوس ويضيعنا كلنا.
