مستنيك 2
إلتفتت إليها إحسان تقترب منها وهي تقول:
_أبداً والله.
_أمال إيه اللي خلاكي تقولي الكلام ده؟
جلست إحسان علي الكرسي جوار سريرها وهي تتنهد قائلة:
_مش عارفة.. مش حاسة إن قمر مبسوطة ومرتاحة زي مابتحاول تبين لنا، عنيها دايماً فيها حزن ووشها أصفر وكأنها مبتعرفش تنام من القهر، دي بنتي وأنا عارفاها، مبتقدرش تخبي مشاعرها مهما حاولت.
_متكبريش المواضيع ياإحسان، بنتك زي الفل، انتِ بس اللي بتحبيها بزيادة و حاسة بالذنب عشان غصبتي عليها تتجوز بدر .
أطرقت إحسان برأسها قائلة بحزن:
_يمكن معاكي حق..
ثم رفعت وجهها تتطلع إلي أختها قائلة:
_بس قلبي بيقولي إني صح وإنها مش مرتاحة، مش يمكن حست إن ملهاش مكان في حياة بدر، مش يمكن حست إنه لسة بيحب مراته وباقي علي ذكراها.
_أنا كنت بفكر زيك بالظبط، كنت حاسة بالذنب اني غصبت علي ابني وظلمته وظلمت قمر معاه لما عملت كدة، بس من أول مرة شوفتهم بعد الجواز والإحساس ده راح من عندي خالص..انتِ مشوفتيش كانت بتبصله ازاي؟ وهو كان مهتم بيها وبراحتها ازاي، ياشيخة ده مهمهوش الناس وكلامهم وسابها تعمل اللي يريحها، فيه في الدنيا راجل هيعمل كدة لو مبيهتمش بمراته وبيحبها؟
_مش عارفة.. مش عارفة .
ربتت كريمة علي يد أختها وهي تقول بحنان:
_ابعدي الشيطان عنك وقومي اتوضي وصلي ركعتين وادعيلهم وبإذن الله أنا واثقة ان ربنا هيجيب دعواتنا وهيقرب بينهم وبكرة تكمل فرحتنا بيهم لما نشوفهم سعدا مع بعض وجايبين لنا حفيد ينور بيتنا.
_يارب ياكريمة.. يارب.
_مستنية إيه؟ قومي بسرعة دي الصلاة والدعوات في الوقت ده مُجابة.
نهضت إحسان بحماس وقد انتقل إليها يقين أختها في رحمة الله بهم واستجابته لدعواتهم بينما تتابعها كريمة بعيون حانية قبل أن تنظر إلي بارئها وترفع يدها بالدعاء بدورها.. تبتهل إليه بقلبها ولسانها.
الفصل العاشر
_قولتلك مليش نفس ياسوزان، روحي انتِ وسيبيني في حالي.. أووف.
_انتِ بتتنرفزي عليا يانفين؟ أنا غلطانة أساساً إني محبيتش أروح للشلة من غيرك، أنا قايمة ماشية.. ومن غير باي كمان.
سارت سوزان مبتعدة بإتجاه بوابة النادي بينما تابعتها نفين بعيون حانقة.
_نفسي أعرف إزاي أنا وانتِ إخوات من أم واحدة وأب واحد.
جلس مراد جوارها يقول بلهجة ساخرة فطالعته بحنق قائلة:
_تصدق إن أنا كمان بسأل روحي نفس السؤال.. ازاي أنا وانت إخوات بجد؟
