مستنيك 2
ضرب صلاح كفاً بكف قائلاً:
_إزاي ياجدع؟ وهو الصاحب برضه يفرق بين صاحبه ومراته.
_لما يكون شايفها مش مناسبة ليه ومش هتسعده.
مال صلاح للأمام يقول بخبث:
_الصاحب اللي بجد وقتها ينصحه مش يلف من وراه ويزق حد علي مراته.. قولتلك يامراد بيه أنا مبحبش اللف والدوران، تعالالي دوغري تجد مايسرك.
_أختي بتحبه وعايزاه وأنا طلبات أختي أوامر.
_قولتلي.. لأ ابن أصول بصحيح، طيب إذا كان كدة أنا معاك، آخد أنا رقية والمودموزيل أختك تاخد غريب وسرك في بير، إنت قولت هتديلي كام؟١٠٠ ألف جنيه.
_لأ قولت خمسين ياخفيف.
_زي بعضه.. رضا قوي.. احنا هننهب.. مقولتليش بقي، عندك خطة ولا تسيب مسيو صلاح يفكرلك في واحدة جهنمية.
_خلي أفكارك لنفسك يامسيو.. أنا بحب كل حاجة تمشي زي ماأنا راسمها وبس.. bien؟
ابتسم صلاح بخبث قائلاً:
. bien mon cheri _
______
النفوس التي لفها السواد تُقبّح كل جمال وتجد الراحة في إسقاط أفعالهم علي الآخرين فالكاذب يصف غيره بالكذب والحاقد يصف غيره بالحقد، إنها طريقتهم المشينة في أن يروا أنفسهم بصورة بريئة لا تمت للواقع بصلة، إنهم مجرمون يحبون إرتداء ثوب عفة لا ولن يليق بهم أبداً.
قالت آمنة(زوجة راضي الإبن الأكبر لهمام) :
_شوفوا مين اللي جاي هناك ده؟ وه وه.. كن رقية صابها مكروه.
قالت سعاد:
_نسوان مبتختشيش صوح، مهملاه يشيلها إكده كدام الخلج، الناس في البلد هياكلوا وشنا.
قالت نجاة بقلق:
_وده وقته ياسعاد.. هموا بينا نشوف حوصل إيه لرقية.
نهضت النسوة بسرعة يتبعن غريب الذي أسرع برقية إلي المنزل يرتقي درجات السلم بسرعة متجهاً إلي حجرتها، وما إن دلف وأجلسها علي السرير حتي بادرته نجاة قائلة:
_حوصل إيه ياولدي؟ مالك يابتي؟
_مفيش ياتيتة وقعت علي رجلي و اتلوت.
_ألف سلامة عليكي يابتي.
مطت سعاد شفتيها تقول بهمس ساخر:
_تيتة.. دلع بنتة ماسخ صوح.
وكزتها تهاني(زوجة صالح الابن الأوسط لهمام) بينما قال غريب:
_من فضلكم عايز حتة قماش نضيفة وشوية مية باردة عشان أعملها كمادات علي رجليها.
_ماتسيب شغل النسوان للنسوان يااخوي.
قالتها سعاد فحدجتها نجاة بنظرة رادعة قبل أن تقول لتهاني:
_همي يا تهاني هاتيله اللي قال عليه.
أسرعت تهاني تلبي طلبات غريب بينما قالت نجاة:
_احنا برة ياغريب ياولدي، لو احتجت حاجة قولنا، وانتِ يارقية ارتاحي يانضري، هي عين وصابتكم.. مش عارفة جاتكم منين؟
