رسم ابتسامة 1
فاقت من شرودها عندما استمعت لصوت زياد الذي حضر منذ مدة لكنها لم تنتبه
ابتسمت بهدوء.. هو الوحيد هنا الذي يشعر بها. لذلك لا تريد اثارة ريبته.
***
” حبيت صاحب الكافيه ” همست بها وهي تستند على ظهر الفراش لتعتدل مريم جالسة
” يخربيتك.. كان راجل كبير كدة زي عمران”
انتفضت عليا هاتفة : لأ طبعاً دا كان شاب صغير وزي القمر.. عيون وشعر حاجة كدة تقفيل تركي
ابتسمت مريم : طيب كملي
عادت تستند على الفراش مرة أخرى : المكان كان بتاعه بس هو كان بيشتغل معانا عادي وبيقدم المشاريب وبيدخل المطبخ حبيته و لما حسيت اني بحبه وبقيت اتضايق من الليل عشان هسيبه بقيت استنى الصبح يطلع عشان اروح واشوفه وقتها كان لازم ابعد..
“ماكنش بيحبك؟”
حركت رأسها نافية : ماكنش يعرف اصلا ولا حس بيا
“طب ليه يابنتي سيبتي المكان”
اجابتها بمرارة : عمره ما كان هيحبني يامريم.. وجودي جنبه كان هيوجعني.. انا فين وهو فين
تغضن جبينها بغضب : يعني ايه انا فين وهو فين.. هو انتِ مش بني ادمة زيك زي غيرك الفقر عمره ما كان عيب
“عند الناس دي الفقر عيب وغلط كبير كمان.. احنا مذنبين ف عيونهم عشان ماعندناش اللي عندهم.. شايفنا دايما تحت وهما فوق قوي”
معها كل الحق فيما تقوله.. اخفضت عينيها لتتابع الأخرى بتساؤل : عمرك حبيتي يامريم؟
رفعت عينيها بصمت.. حائرة ماذا تخبرها.. اتخبرها انها احبت احدهم ذات يوم وتركها لأنها فقيرة.
حركت رأسها نافية بشرود : لأ.. عمري ماحبيت.
***
اخفى الإطار خلفه عندما دلفت عليه الغرفة.. كان يحكي معها ككل ليلة لكن تلك المرة اقتحمت شقيقته الغرفة
“بتعمل إيه؟” سألته بخبث ليبتسم وينهض يضع الصورة بداخل الجارور لكنها اختطفتها منه تنظر لها ولم يحاول اخذها منها
هي تعلم عنه كل شئ لا يحتاج لـ أن يخفي شيئاً
نظرت له بحنان : لسة بتحبها يا زياد؟
تنهد بقوة : قوي يا أروى.. ماكدبتش لما قولتلها اني هحبها كل يوم اكتر من اللي قبله.. حبها بيزيد جوايا كل ثانية حتى وهي بعيد
جلست على الفراش هامسة : روحلها يا زياد.. روحلها واخطفها من بين كل الناس وغصب عن اي حد
التوت شفتيه بإبتسامة مريرة : ياريت كان الموضوع سهل بالشكل دا يا أروى مانتي عارفه اللي حصل زمان وبابا…
بترت حديثه هاتفة بغضب
“بابا دا اخر واحد تعمله حساب..”
رفع حاجبيه بدهشة ثم اقترب يمسك بكفيها
