رسم ابتسامة 1
“ايوة يمكن مثلا صعبت عليه ف بيعطف عليها”
ابتسامة ساخرة ارتسمت فوق شفتيها : بيعطف عليها ف كافيه ، قاعدين على ترابيزة واحدة وبيبصلها بالطريقة اللي شوفتها دي
رفعت صديقتها كتفيها بحيرة فتابعت : انا هتجنن ياجيسي.. زياد يعرف البنت دي منين.. هتجنن
“طب ما تسأليه.. اكيد مش هيكدب عليكِ”
حركت رأسها نافية وهي تضع لفافة اخرى بين شفتيها : لأ هيكدب.. نظرته ليها بتأكدلي انه هيكدب وان الموضوع مش سهل
“طيب هتعملي إيه؟.. هتفضلي على حيرتك دي.. انتِ هتتجنني كدة”
لمعت عينيها بتوعد هامسة : هتصرف.. هعرف بطريقتي.
***
دلف إلى المقهى.. عينيه تدور به.. ابتسامته الاسيرة تزين ثغره دائماً
انتقى مائدة جانبية تكشف المكان بأكمله وجلس فوقها
رفع ذراعه يشير للنادل يطلب قهوته التي لم يسعفه الوقت لتناولها
رفع عينيه عن كوب القهوة واتسعت ابتسامته عندما رآها
وهي لم تصدق عينيها وهي تراه يجلس بالمقهى ويتناول قهوته بهدوء واناقه لا تغيب عنه
” مش ممكن عليا..”
فاقت من تحديقها به على نبرته التي هتفت بأسمها ف تقدمت منه بإبتسامة : مستر رامز.. ازيك ؟
دعاها للجلوس وهو يجيبها : انا تمام.. انتِ اللي فين وعاملة ايه؟
اخفضت عينيها مبتسمة : الحمدلله.. وزي مانت شايف بشتغل هنا
رمق المكان بنظرة شاملة ثم عاد اليها قائلاً : تعرفي انا محظوظ اني شوفتك النهاردة
برقت عينيها بسعادة ليتابع : بصي بقا ياستي انا هفتتح مطعم كبير قوي وبصراحة عايزك معايا وهديكي ضعفين مرتبك هنا
“ايوة.. بس…”
“مابسش.. انا محتاجك.. انتِ عرفاني مابعرفش اشغل اي حد عندي.. لازم يبقى عنده خبرة ف المجال دا او خريج سياحة وفنادق وانتِ عندك خبرة كبيرة اشتغلتي معايا تلات سنين وبصراحة لحد دلوقتي معرفش ليه سيبتي الكافيه”
توترت عينيها فتابع : ها هتيجي تشتغلي معايا
تنهدت بقوة.. هي لا تقوى على الرفض.. تريد الإقتراب منه حتى لو كان ذلك اكثر ما يؤلمها
أومأت له : موافقة.. بس هشغل معايا واحدة صاحبتي
قطب حاجبيه متسائلاً : مين دي
اجابته : مريم صاحبتي خريجة سياحة وفنادق.. كانت بتشتغل هنا بس حصل مشكلة من فترة وسابت الشغل وحالياً هي مش لاقية شغل خالص
ابتسم بهدوء : وماله ماعنديش مشكلة
اخرج نقوده ووضعها على الطاولة ثم نهض وقبل ان يرحل وضع بداخل راحتها ورقة مطوية : هستناكوا بكرة الساعة 9
