رسم ابتسامة 1
“غلس على فكرة.. مانت عارف اني مستنياك”
ضحك بخفة وهو يجلس على الأريكة : وحشتيني
“كداب وبياع كلام.. انا كنت لسة معاك من شوية”
“انتِ عارفة انك بتوحشيني وانتِ معايا”
اتسعت ابتسامتها بخجل فتابع : نيمتي مريم زي كل يوم
كبحت ضحكاتها حتى لا توقذها : هي خلاص عرفت اللي فيها وبقت بتنام بدري عشان تخليلي الجو
اجلى صوته ثم سألها : صحيح قوليلي.. ايه حكاية مريم مع بكر؟
قطبت حاجبيها : حكاية ايه.. مافيش حكاية خالص
“يعني شايفهم قريبين من بعض.. بيقعدوا لوحدهم كتير”
التفتت تنظر لمريم الغارقة في نومها ثم اجابته : مافيش اي حاجة بينهم.. هو بصراحة بكر عايز يتقدم لها.. هو لمح بحاجة زي دي لكن انا قولتله مايتسرعش لأن مريم مابتفكرش في الجواز دلوقتي
صمت طويلاً يستوعب حديثها فـ همست : روحت فين؟
“ماروحتش بس مستغرب.. ليه مريم مابتفكرش ف الجواز”
تنهدت قائلة : دي حكاية طويلة هحكيهالك بعدين..
ثم تابعت بلوم : ثم تعالى هنا قولي.. احنا كل يوم هنفضل نتكلم عن مريم وحياتها.. انا ابتديت احس انك بتكلمني عشانها
اجابها ضاحكاً : اكيد لأ.. كل الحكاية اني فضولي شوية واحب اعرف كل حاجة
“اممم.. مابحبش الناس الحشرية دي” همست بمزاج ليتصنع الحزن
“كدة يعني.. ماشي ياستي”
“طب خلاص ماتزعلش.. انت كمان وحشتني”
همس معاتباً : يااه.. لسة فاكرة تردي
“مانت رغاي قوي بصراحة وبعدين انا لازم اقفل.. عندي شغل الصبح ومديري رخم بيتضايق لما بتأخر
” ياباشا المكان مكانك.. واعملي اللي انتِ عايزاه”
ضحكت بخفوت ثم اغلقت معه وتمددت على الفراش تفكر.. لما يريد التقرب منها.. كانت تعمل معه لعامين كاملين ولم يحاول ولو مرة انا يحادثها..!!
***
وقف بسيارته بعيداً عن المطعم.. يراقبها منذ اسبوع.. وينتظر لحظة خروجها بمفردها
واليوم اتيحت له الفرصة
صديقتها خرجت قبلها برفقة رامز وهي تخرج بمفردها الآن
قاد سيارته ببطئ حتى رآها تعبر الطريق فأسرع قليلاً وبخطة محسوبة اصطدم بها
وهبط مسرعاً بعد ان وجدها لا تستطيع الوقوف
“انا اسف بجد.. انتِ كويسة؟”
امسكت قدميها صارخة : انت اعمى.. مش تفتح
جثى امامها يحاول لمس قدميها : انا متأسف بجد.. رجلك كويسة ؟
حاولت الوقوف لتصرخ من شدة الألم : مش قادره اقف
اسندها حتى سيارته : لازم نروح مستشفى
اجلسها في المقعد الخلفي وجلس هو خلف المقود بينما عينيه لا تحيد عنها من خلال المرآة
يرى وجهها المحتقن من شدة الألم ف تصنع الأسف : انا اسف بجد يا…
